SAN JOSE, Antique (PIA) — Ang Antique Provincial Disaster Risk Reduction and Management Council (PDRRMC) nagapanghanda sa epekto kang sobra nga init kag pabag-o sa klima ukon climate change.
Sa ginhiwat nga meeting kang PDRRMC, si Vice Chairperson Lazaro Petinglay kag PDRRM Officer Broderick Train nagpasiguro nga nagahimo kang tikang ang PDRRMC bilang konseho agud makahanda ang mga ahensya kang gobyerno.
Sa ginbalita nga pagtaas kang temperatura sa Western Visayas, ang Department of Science and Technology nagpaandam sa publiko nga maghalong batok sa mga sakit nga pwede madara kang sobra nag init parehas kang pagkalipong kag stroke.
Ang Bureau of Fire Protection (BFP) kag ang Philippine National Police (PNP) nagreport kang anda mga inisyatibo agud mapaandaman ang publiko sa mga malain nga hitabo tungod sa sobra nga init.
Ang BFP nagpaandam sa publiko nga tatapun kang mayad ang panimalay kag indi magpilak kang sigarilyo bisan diin lang ilabi na gid sa lugar nga may layung nga hilamun tungod pwede dya makatuga kang sunog.
Samtang, ginpakigbahin ni Petinglay ang mga proyekto nga Local Adaptation to Water Access (LAWA) kag Breaking Insufficiency through Nutritious Harvest for the Impoverished (BINHI) nga nagakantidad kang P22 ka milyon para mapasanyog ang suplay kang tubig sa mga kabalayan para makaprodukto ka laswa kag karaan ang mga panimalay.
Ang San Jose Waterworks Service Cooperative nagpalawid man kang anda operating hours para mapasiguro nga may bastante nga suplay kang tubig ang mga konsumidor.
Ang Integrated Provincial Health Office (IPHO) nagpaandam man sa pubiko kang posible nga pagduging kang sakit parehas kang dengue kag leptospirosis tungod sa indi husto nga pagtago kang tubig.
Sa mga kasapatan kag agrikultura, ang Provincial Veterinary Office kag Office of the Provincial Agriculturist nagahimo man kang mga inisyatibo agud mabuligan ang mga mangunguma. (AGP/PSM/PIA Antique)
