Nagpanugyan ang mga miyembro kang PDRRMC sa mga katawhan sa pagsunod sa mga patakaran kang otoridad agud mapasiguro ang matawhay kag makahulugan nga Semana Santa. (Litrato: PIA Antique)
SAN JOSE, Antique (PIA) — Nagapanghanda ang Provincial Disaster Risk Reduction and Management Council (PDRRMC) ka probinsya kang Antique sa Semana Santa kag mainit nga panahon.
Sa ginhiwat nga press conference nga gin-organisar kang Philippine Information Agency kaimaw ang PDRRMO, si Provincial DRRM Officer Broderick G. Train nagreport kang mga pagpanghanda kang mga ahensya kang gobyerno para sa Semana Santa kag mainit nga panahon.
Ginreport kang DOST ang ginapaabot nga mainit nga klima, gani kinahanglan handa ang tanan nga mga ahensya kang gobyerno sa pagbulig sa mga katawhan kon kinahanglanon.
Ginpasiguro ni Train nga ang mga ahensya kang gobyerno handa kag may mga plano sa pagpatigayon kang PDRRMC agud mapasiguro nga masabtan ang mga kanahanglanon kang katawhan.
Ana ginpangabay ang mga katawhan nga magsunod sa mga panugyan kang otoridad agud mangin masulhay ang pagsaulog kang Semana Santa nga luwas sa katalagman kag emerhensya.
Sa bahin kang Bureau of Fire Protection (BFP), si Senior Fire Officer Jefferson Cordero nagpangabay sa tanan nga mag-uligmat kag siguraduhon nga wara ti matabo nga sunog sa mga panimalay kon ang mga naga-uli magpanaw sa bakasyon.
Amo man, si DENR-PENRO Cynthia Blancia nagapangabay sa mga nagatukad sa kabukidan nga maghalong sa andang sigarilyo nga dara tungod pwede dya halinan kang sunog sa kabukidan kag respetuhon ang mga tanum kag dunang manggad nga indi marangga tungod sa turismo.
Ang asosasyon kang mga Municipal DRRM Officers sa mga kabanwahanan nga ginapangunahan ni Joy Lancara kang Belison nagpasiguro nga ang tanan nga kabanwahan may handa nga plano agud mapasiguro ang masulhay nga pagsaulog kang Semana Santa kag summer vacation. (AGP/PSM/PIA Antique)
