SAN JOSE, Antique (PIA) — Nagpangandam ang Antique Provincial Health Office (APHO) sa liwat nga pagtuhaw kag posible nga pagsaka kang kaso kang mga sakit nga masami nagaguwa kung tag-ururan.
Sa sangka programa sa radyo, gin-abisuhan ni APHO Health Education and Promotion Officer Joenes Jereza ang publiko nga protektaran ang kaugalingon kag pamilya batok sa “WILD” diseases.
Hambal ni Jereza, ang WILD diseases ginalakipan kang Water and Food-borne diseases, Influenza-related diseases, Leptospirosis, kag Dengue.
Pira sa mga water kag food-borne diseases nga dapat bantayan amo ang diarrhea kag typhoid fever halin sa kontaminado nga tubig kag pagkaon.
Dapat man bantayan kang publiko ang influenza-related diseases nga makaralaton nga mga sakit sa respiratory system, kag leptospirosis nga sangka bacterial disease halin sa ihi kang mga sapat pareho kang balabaw.
Dugang pa, bahul ang pagpangandam kang mga otoridad batok sa dengue bangod sa masobra 180 ka mga kaso nga narekord kang Department of Health (DOH)-Western Visayas Center for Health Development (WVCHD) halin Enero tubtob Abril 2024.
Ginapaabot man ang pagtaas pa kang mga kaso kang dengue sa pagsulod kang tag-ururan, gani, ginaagda kang PHO kag DOH ang publiko nga magsunod sa “5S” strategy kontra dengue.
Una, kinahanglan nga mag-“search and destroy” kang mga posible nga iritlogan kang lamok kaangay kang mga botelya, balde, paso kag iban pa; ikarwa, mag-gamit kang “self-protection” kaangay kang bayo nga may malabog nga luab kag insect-repellent lotion; sunod “seek early consultation” kung ginahilanat sa sulod kang 1 tubtob 3 ka adlaw; “support spraying/fogging activities” sa mga komunidad nga may pagtaas kang mga kaso sa sulod kang darwa ka semana; kag “sustain hydration” ukon mag-inom kang duro nga tubig.
Pira sa mga sintomas nga kinahanglan bantayan amo ang sakit kang ulo, pagparanakit kang lawas, pagkadura kang gana sa pagkaon, pagsuka, kag pagtuhaw kang rashes.
Masami nagaguwa ang mga lamok nga nagatuga kang dengue sa aga kag hapon. (AGP/BPS/PIA Antique)
