Ginpangunahan ni Police Provincial Director PCOL Lea Rose Peña (center- right) kag COMELEC Provincial Director Atty. Will Arceño (center-left) ang pagpatuman sang checkpoint sa banwa kang Hamtic, Antique. (Laragway: PNP Antique)
SAN JOSE, Antique (PIA) — Nagapangabay sa publiko ang Antique Police Provincial Office nga magkooperar sa ginapatuman nga checkpoint.
Suno kay Police Lieutenant Willy D. Diel kang Antique Police Provincial Office, dya kalakip sa mga pamaagi nga ginapatuman kang kapulisan agud mapasiguro ang malinong kag matawhay nga election period nga nag-umpisa katong Enero 12 hasta Hunyo 11, 2025.
Ana ginpasiguro sa publiko nga ang mga kapulisan nakahanda sa pagpatuman kang layi para sa ginapaabot nga eleksyon sa Mayo 12, 2025.
Ang mga checkpoints ginapatuman sa idalum kang mandato kang Commission on Elections (COMELEC) kag dya makita sa mga kabanwahan sa probinsya.
Ginapangabay man kang mga kapulisan ang publiko sa pagsunod sang “election gun ban” kag hugot nga ginadumilian ang pagdara kang pusil kag makamamatay nga armas kun wara ti nagakaigo nga permiso tungod dya kumpiskaron sa checkpoint.
Para sa mga kandidato, ginapangabay kang mga otoridad ang anda pagpanguna sa pagsunod sa layi para mangin huwaran kang anda nga sumulunod.
Sa mga katawhan nga may mga pusil nga indi rehistrado ukon ”loose firearms,” ginahinyu man kang mga kapulisan nga dya i-surender kang tag-iya sa otoridad para malikawan ang mataas nga penalidad kun hinali nga madakpan.
Padayun ang PNP nga magahiwat kang koordinasyon kag hinun-anun sa COMELEC, Philippine Army, kag iban pa nga ahensya kang gobyerno agud mapasiguro ang malinong kag matawhay nga pinili-ay. (AGP/PSM/PIA Antique)
