Mga day-o nga pispis nga nakita sa katubigan kang Antique. (Litrato: DENR-PENRO)
SAN JOSE, Antique (PIA) — Ang mga wetlands, ukon katubigan sa Antique nangin puluy-an kang mga linibo nga “migratory birds” ukon mga day-o nga pispis nga naga-agto sa Antique.
Suno kay Department of Environment and Natural Resources information officer Mavidel Otayde, tanda naghiwat kang bird identification and counting kang kan-o gid lamang sa Poblacion, Belison kag Carit-an, Patnongon para makita ang mga sahi kang day-o nga pispis.
Ang mga klase kang kapispisan nga nadokumento amo ang Philippine Duck, Black-crowned Night Heron, Great Egret, Collared Kingfisher, Wandering Whistling Duck, Bard Rail, Moorhen, Rufous Night-Heron, Philippine Pied Fantail, Black-crowned Night Heron, Common Kingfisher, kag Yellow-vented Bulbul.
Nakita man ang Chestnut Munia, White-browed Crake, Little Egret, Zebra Dove, Brahminy Kite, Intermediate Egret, Black-winged Stilt, Bee Eater, Wood Sandpiper, Turtle Dove, Pacific Plover, Striated Heron, Common Sandpiper, Grey Heron, Swiflet, Cattle Egret, kag Javan Pond Heron.
Ang DENR naghambal nga ang mga kaumahan, isdaan, kasapaan, kag iban pa nga lugar nagatao kang urulian sa mga day-o nga kapispisan.
Daya nga mga katubigan nagatao kananda kang pagkaun, parahuwayan, kag pangitlogan.
Sa pagselebrar kang “World Wetland Day,” ang DENR nagpatigayon kang mangrove planting sa Barangay Carit-an, Patnongon, Antique nga nakatanum kang 2,000 mangrove propagules.
Ginhambal ni Otayde nga ang mangroves may importante nga papel sa pagprotektar kang baybayun, “biodiversity habitat,” kag “carbon sequestration.”
Dugang na pa, nga ang tema kadya nga tuig nga “Protecting Wetlands for our Common Future” nagapakita kang importante nga papel kang mga katubugan sa kabuhi kang katawhan.
Ang DENR Antique nagapangabay sa tanan nga Antiqueño nga magbinuligay sa pagpreserbar kag protektahan ang mga wetland sites sa probinsiya. (AGP/PSM/PIA Antique/DENR kaimaw ang mga balita halin kanday DGE/AVS)
