Ginapakita ni Aben Ortega (kilid sa wala) ang mga pasilidad nga ana nabaton sa DOST bilang kabahin ka iFWD PH nga programa kang DOST. (Litrato: DOST)
SAN JOSE, Antique (PIA) — Si Aben Ortega, kato anay sangka Overseas Filipino Worker (OFW), nangin negosyante paagi sa bulig kang mga ahensya kang gobyerno.
Nagtukod si Ortega kang ana negosyo matapos ang mga paghanas kag paggiya kang Department of Trade and Industry (DTI) nga nagbulig kana nga mangin kabahin kang Kapatid Mentor Me program bilang benepisyaryo.
Tungod sa ana katandus kag pagpaninguha, tana gingiyahan kang Department of Science and Technology (DOST) para mangin benepisyaryo pa gid kang programa nga Innovation for Filipinos Working Distantly from the Philippines ukon iFWD PH nga nagatugro kang mga paghanas, paggiya sa pagpatuman kang programa, kag pondo.
Gin-umpisahan ni Ortega ang AI Bin Packaging Services katong Disyembre 2022.
Ang AI Bin Packaging Services nagabuhat kang pakete kang kalamay nga pula ukon muscovado sugar sa brand nga “Handums.”
Tungod sa manami nga pagputos kang pakete ukon packaging, dya nangin popular sa mga katawhan kag pwede run mabakal sa mga nasari-sari nga baraligyaan sa iba pa nga lugar sa Panay lakip na ang mga department stores ukon malls.
Paagi sa ana nga brand name nga Handums, nagatuyo si Ortega nga taw-an pa gid ka importansya ang mga lokal nga produkto para makatao kang raku nga orubrahan sa mga taga-Antique.
Nagahandum si Ortega nga mapadayon ang mga proyekto para makabulig sa raku pa gid nga katawhan. (AGP/PSM/PIA Antique kaimaw ang mga balita halin kay JYD/UA intern)
