DOLE Antique facilitates the job fair during the ‘Handog ng Pangulo Serbisyong Sapat para sa Lahat’ program in San Jose, Antique. (Photo by PIA Antique)
SAN JOSE, Antique (PIA) — Raku nga mga Antiqueños ang nakabaton kang bulig halin sa Department of Labor and Employment paagi sa sari-sari na kadya nga programa kang ginhiwat ang “Handog ng Pangulo-Serbisyong Tapat Para sa Lahat” ridya sa San Jose de Buenavista kasan-o gid lamang.
Ang programa nga Tulong Pangkabuhayan for Disadvantaged Workers nagpanagtag kang masobra P5 ka milyon para sa masobra 900 ka mga benepisyaryo.
Dya nagalakip kang anda sweldo, “insurance” kag mga “protective equipment.”
Si Governor Rhodora J. Cadiao nagpasalamat kay Presidente Ferdinand Marcos, Jr. sa mga proyekto nga ginpatigayon kang gobyerno sa mga Antiqueños sa tion kang ana kaadlawan ilabi na gid nga dya nag-abot sa tion kang kinahanglanun nanda tungod nga tag-ururan kag maiwat ang parangitan-an.
Ana man ginpasalamatan ang mga programa parehas kang Aid to Individuals in Crisis Situation (AICS), Medical Assistance Program (MAEP), TUPAD, kag iba pa nga mga programa nga nakabulig kang bahol sa mga Antiqueños.
Sa ginhiwat nga Job Fair, may kabilogan nga1 5 ka mga kompanya ang nagpamaton kang anda empleyado, 13 ka mga lokal nga kompanya kag darwa ang ”overseas placement agencies.”
May 75 ka aplikante ang nabaton dayon ukon hired on the spot kag 69 sa idalum kang DOLE Government Internship Program (GIP).
Para naman sa proyekto kang parangabuhian, ang Barangay Pangpang Sibalom, Antique nakabaton kang kantidad nga P1,250,000 para sa sari-sari nga proyekto kang 50 ka mga pamilya.
Si DOLE Antique Provincial Director Ma. Cecilia S. Acebuque nagpasalamat sa mga lokal nga opisyales sa anda pagbuligay para mapatigayon nga makadangat ang proyekto sa mga katawhan. (AGP/PSM/PIA-Antique)
