SYUDAD SANG ILOILO (PIA) — Apat ka mga agrarian reform beneficiary organizations (ARBOs) sa probinsya sang Guimaras ang nagbaton sang mga makinarya sa panguma kag mga input sa agrikultura nagikan sa Department of Agrarian Reform (DAR).
Sa report sang Public Information Office sang Guimaras, ginpangunahan ni Executive Assistant III Glicerio Edang nga nagtiglawas kay Gobernor JC Rahman A. Nava, MD ang pagpanagtag sang sining mga makinarya kag agricultural inputs nga ginpondohan sa idalum sang Climate Resilient Farm Productivity Support Program (CRFPS) sang ahensya.
Ginalakipan ang mga benepisyaro sang Avila Farmers Agrarian Reform Cooperative nga nagbaton sang isa ka unit sang four-wheel drive tractor nga may rotavator kag disc flow kag Cabano Upland Agrarian Reform Beneficiaries’ Association (CUARBA) nga nagbaton sang isa ka unit sang hand tractor nga may kumpleto nga implements kag trailer, isa ka unit sang platform scale, 3 ka mga unit sang Knapsacks Sprayer, 25 units sang pala kag 25 ka mga unit sang sadol.
Nagbaton man ang Purok 7 Agrarian Reform Beneficiaries Association sang Alaguisoc, Jordan sang isa ka unit sang bag-o nga motorsiklo kag apat ka mga unit sang power spray.
Samtang isa naman ka unit sang feed pellets mill kag isa ka unit sang hammer mill ang nabaton sang M. Chavez Agrarian Reform Beneficiaries Association.
Dugang pa ang mga ARBO nagbaton man sang sustainable livelihood projects kag agricultural farm inputs nga nagatuyo nga madugangan ang kita sang mga benepisyaryo pinaagi sa pagpanubo sang kapierdihan sa produksyon sa palay kag iban pa nga patubas kag subong man ang bili sang produksyon.
Gintambungan man ang kahiwatan nanday OIC-PARPO II Lourdes F. Novilla kag Arni Sumaylo nga nagtiglawas sa rehiyunal nga talatapan sang DAR diri sa Nakatundan Bisayas. (AAL/LAF/PIA6-Iloilo)
