CEBU CITY, Cebu (PIA) – Isip kabahin sa ilang ‘Compassion Project’, ang Association of Regional Executives of National Agencies in Central Visayas (ARENA-7) karong adlawa Marso 19, nagpahigayon ug pangpanghatag sa mga hinabang ngadto sa mga biktima sa sunog nga nahitabo sa Sitio San Vicente, Brgy. Lahug, Cebu City.
Ang asosasyon nituol og 5 ka kilong bugas ug grocery package nga naglakip sa dry goods ug hygiene kits.
Samtang ang Department of Social Welfare and Development (DSWD) 7 mihatag usab ug family food packs nga dunay sulod nga bugas, canned goods, cereal, ug kape.
Matod sa ARENA-7, anaa sa 82 ka mga pamilya nga naapektuhan sa sunog nga nahitabo niadtong Pebrero 27 ang nakadawat sa mga nahisgotang hinabang.
Sa iyang mensahe, si ARENA-7 President ug Department of Education 7 Regional Director Salustiano Jimenez nga padayun nga maningkamot ang asosasyon sa pagtabang sa mga nanginahanglan. Pinaagi sa ilang tinuig nga ginabuhat nga “Compassion Project.”
“Kini atong compassion project, kanunay gyud namong gibuhat labi na sa mga panahon nga naay manginahanglan, ginagmay ra ni amoang tabang gikan sa among kasing-kasing, nanghinaot sad mi nga naa mi mahatag sa inyu bisan ginagmay lang,” si Jimenez miingon.
“Hinaot nga padayun ang inyung pagsabot sa atong gobyerno, ug kami pud sa national government agencies, naningkamot sad mi unsa among pwede matabang sa inyuha,” dugang niya.
Samtang, si Ronald Villanueva, 36 anyos ug usa sa mga nabiktima sa sunog, mipadayag usab sa iyang dakong pasalamat sa mga hinabang nga ilang nadawat gikan sa gipahigayon nga aktibidad sa pagpangulo sa ARENA-7.
“Ngayo mig pasalamat sa naghatag ani nga grasya, pasalamat kaayo sa ginoo nga bisan ingani among kahimtang naa gihapon mi nadawat. Salamat gyud kaayo sa ARENA-7 bisan ginagmay lang ni inyung gihatag pero kinasing-kasing, dako gyud kaayo ning tabang sa among pamilya, hinaot nga daghan pa inyung matabangan nga mga nanginahanglan.”
Kini nga kalihokan gitambungan usab ni Philippine Information Agency 7 Regional Head Fayette C. Riñen inubanan sa mga member agencies DSWD ug Department of Environment and Natural Resources.
Ang ‘Compassion Project’ usa ka inisyatibo sa ARENA-7 nga nagtunol og assistance ngadto sa mga labing nagkinahanglan ug kini ginahimu sa asosasyon matag tuig.
Ang pangpanghatag sa mga hinabang karong tuiga nahitabo didto sa Marcelo Fernan Press Center, Sudlon, Brgy. Lahug, Cebu City. (RGC/PIA7 Cebu)
