SAN JOSE, Antique (PIA) — Gindeklara kang Philippine Army (PA) ang pagkabungkag kang Southern Panay Front (SPF) kang New People’s Army (NPA) nga naga-operate sa idalom nga parte kang mga probinsya kang Antique kag Iloilo.
Pagkatapos kang madinalag-on nga military operations kag sa pagbinuligay kang mga katapo kang Provincial Task Force to End Local Communist Armed Conflict (PTF-ELCAC), natigayon nga bungkagon ang Southern Panay Front paagi sa pag-surrender, pagka-aresto, kag pagkapatay kang anang mga lideres.
Paagi sa Resolution No. 05-2024 nga ginpaguwa kang Hunyo 21 kadya nga tuig, opisyal nga gindeklara kang National Joint Peace and Security Coordinating Center (NJPSCC) ang pagkabungkag kang Southern Panay Front.
Buot hambalon, hindi ron makasarang ang rebelde nga grupo nga magpatigayon kang opensiba batok sa militar bangud sa pagkadura kang andang mga katapo, armas, kag iban iban pa nga kagamitan.
Para man balabagan ang liwan nga pagbalik kang andang impluwensya, padayon ang militar sa paghiwat kang local peace engagement sa mga komunidad, Mobile Community Support Sustainment Program, kag opensiba kung kinahanglan.
Dugang pa, sa sangka pagpulung-pulong kang PTF-ELCAC kang Hulyo 25, gintugruan igtalopangod ni PA 61st Infantry Battalion commander Lieutenant Colonel Arturo Balgos, Jr. ang pagbinuligay kang mga katapo kang PTF-ELCAC para masiguro ang kalinong kag katawhay sa probinsya.
Gin-agda man ni Balgos ang mga nabilin pa nga miyembro kang mga rebelde nga grupo nga magsungka ron kag liwan nga tukuron andang kabuhi.
Kadya nga tuig, halin Enero 1 tubtob Hulyo 24, may 54 ka mga anay rebelde nga nagsungka sa mga otoridad, samtang 5 ka mga rebelde kag 25 ka mga taga-suporta nanda ang naaresto paagi sa kolaborasyon kang Army kag Philippine National Police (PNP). (AGP/BPS/PIA Antique)
