TAGBILARAN CITY, Bohol (PIA) — Sa nagkalapad nga hagit sa pagpakatap sa sakto ug kasaligan nga kasayuran aron ang katawhan magamhan sa paghimo sa saktong desisyon, gipahigayon sa bahan sa mga information officers and drone photo, videography ug photojournalism niining bag-o pa lamang.
Kauban sa makuti nga gimbuhaton sa pagpakatap sa kasayuran, ilabi na kabahin sa buhat sa kagamhanan, importante ang pagkat-on sa tukma nga kapasidad sa pagsaysay, pinaagi sa hulagway kay kini usa ka pamaagi sa pag-ila sa matuod nga kasayuran, segun pa sa tigpasiugda sa bansaybansay.
Atul sa binuwan nga tigum sa Association of United Development Information Officers (AUDIO) sa Bohol niadtong Mayo 24, didto sa lungsod sa Alicia, nahukman nga isukip sa schedule sa usa ka adlaw nga tigum ang photo-journalism ug ang drone photography ug videography.
Kini aron makakuha ang mga information officers sa mga kapasidad nga magamit sa iang pagpakatap sa kasayuran, ilabi na niadtong may kalambigitan sa mga proyekto sa lokal nga kagamhanan, ang photojournalism ug video ug drone photography may dako og ikatampo sa pagpadayag sa matuod nga sugilanon.
Niining panahon sa paspas nga pagtuis sa kamatuoran pinaagi sa pagpakatap sa mga tinuyo nga bakak, tinuis na sugilanon ug bakak aron pagpasikat sa uban, mao nay sarang napa-uso dungan na usab sa pangandoy sa pagmonetize sa gipanag-iya ga page.
Ang AUDIO, isip kahugpungan sa mga information officers sa mga nasudnong buhatan ug ahensya ug sa mga local nga kagamhanan, may talagsaon nga responsibilidad sa pagsugid sa kamatuoran, ug ang saktong pagkat-on sa mga katakus alang niini, labi nilang gikinahanglan.
Si Christoff Concon, usa ka propesyonal wedding video ug photographer nga sakop sa AUDIO kay information officer sa Trinidad, ang mihandle sa drone video ug photography samtang si Rey Anthony Chiu, manager sa Philippine Information Agency ug news writer photojournalist ang mihimo usab sa photojournalism nga bansay. (RAHC/PIA Bohol)
