BACOLOD CITY (PIA) — Ginkilala bilang Most Business-Friendly Local Government Unit (LGU) ang Bacolod City sa Provincial Highly Urbanized Cities Category.
Nangibabaw ang Bacolod sa iban pa nga mga syudad sa pungsod, kaangay sang Baguio, Cagayan de Oro, Iloilo, kag Mandaue, kag nakuha ang prestihiyoso nga pagkilala gikan sa Philippine Chamber of Commerce and Industry (PCCI).
Ginpangunahan ni Mayor Alfredo Abelardo “Albee” B. Benitez, kaimaw ang iban pa nga mga opisyal sang syudad, ang pagbaton sang nasambit nga pagkilala sa ginpatigayon nga ika-50 nga Philippine Business Conference sang Oktubre 23 sa Pasay City.
Sa iya nga mensahe, ginhambal ni Mayor Benitez nga ang pagkilala halin sa PCCI nagapakita sang dedikasyon sang syudad sa pagsiguro sang pag-uswag sang mga negosyo.
Dugang niya pa, ini isa ka kadalag-an para sa tanan nga mga Bacolodnon.
Ang pagkilala nga Most Business-Friendly LGU sa Provincial Highly Urbanized Cities Category naka-base sa mga masunod nga criteria: fast-tracking sang sustainable local economic development, ease of doing business initiatives, investment promotion efforts, kag enhancing sectoral competitiveness. (AGP/BPS/PIA Negros Occidental/Bacolod PIO)
