NEGROS OCCIDENTAL (PIA) — Nagpanawagan ang isa ka opisyal sang kapulisan sa mga kababaihan sang Brgy. 29 diri sa syudad sang Bacolod nga hibaluon ang ila kinamatarung bilang mga babayi agud mapangapinan nila ang ila kinamatarung kag sang ila kabataan.
Ginpahayag ni Police SSgt. Maicca Arzaga nga imbestigador sang Women and Children’s Protection Desk sang Bacolod City Police Office (BCPO) nga ang Rights of Women under Republic Act 9262 o ang Anti-Violence Against Women and their Children Act of 2004 may tuyo nga mag-edukar kag tagaan penalidad ang mga naga-abusar sa mga kababaihan
Sa ginhiwat nga Brgy. Fora sa Brgy. 29 sining karon lang, iya ginpahayag nga ang Violence Against Women and Children (VAWC) isa ka bagay nga nagapanubo sa pagkatawo sang mga kababaihan.
Ang VAWC ang ginalakipan sang mga pagpang-abuso batuk sa mga kababaihan kag ila mga kabataan nga posible ginahimo sang iya anay bana, live-in partner o iya nga karelasyon.
Suno kay Arzaga ang apat nga mayor nga mga pag-pang abuso batok sa mga kababaihan amo ang sekswal, pisikal, sikolohikal, kag ekonomikal.
Lakip sa pagpang-abuso sekswal ang rape, sexual harassment, acts of lasciviousness, pagkabig sa babayi bilang sexual object, pag himo sang sexually suggestive remarks, pagpanakit sa mga sekswal nga bahin sang lawas sang isa ka babayi, pagpilit sa babayi nga maglantaw sang malaswa nga lalantawon, kag ang pagpilit sini sa iya kag iya bata sa prostitusyon.
Ang pag abuso pisikal may tuyo sa pagsakit sa isa ka babayi dala na ang pagmamahug nga manakit. Lakip na diri ang pagpanumbag, pagpanipa, pagtampa kag paglampos sang bagay sa isa ka babayi.
Nahibaluan nga ang abuso sikolohikal may kaaangtanan sa mga mga masakit o maka insulto nga tinaga nga makahatag emosyonal o mental nga palaligban, suno kay Arzaga.
Kalakip na diri ang pagkontrolar sang mga giho sang isa ka babayi kag iya bata, pagsunod-sunod sa ila kon diin ini magkadto, pribado man o publiko nga lugar o stalking kag ang pagsulod sa ila puluy-an nga wala permiso.
Samtang, ang abuso ekonomikal ang nagadumili sa isa ka babayi nga mag ubra sa isa ka lehitimo nga ulobrahan kag pagkontrolar sang iya kwarta, ang indi pagsuporta sa iya asawa kag bata bisan may ikasarang ini sa paghatag.
Suno kay Arzaga dapat nga mangin maisog ang mga babayi sa pagreport sa kapulisan sang mga abuso nga ila ginaatubang agud masolusyunan kag mauntat ini.
“ Ang VAWC sang kapulisan bukas sa tanan nga tion sa pagbaton kag maaksyon sa mga reklamo. Hindi gid kamo magkahadlok sa pagduso sang inyo kinamatarong agud maapinanan ninyo ang inyo kaugalingon kag sang ang inyo nga mga kabataan. ( AAL/Lljr/ PIA 6 Negros Occidental)
