SYUDAD SANG ILOILO (PIA) — Ginhanas sang Bureau of Fisheries and Aquatic Resources (BFAR) Western Visayas ang bag-o nga batch sang Fisheries Extension Officers (FEOs) nga magaserbe nga mga “mentors” para sa Fisheries and Aquatic Resources Management Councils (FARMCs) sa rehiyon.
Ang paghanas kabahin sang FARMC Strengthening Program sang BFAR, nga tinutuyo nga pabakuron ang kapasidad sang mga lokal nga mga panguluhan sa pag-organisa kag pagsuporta sa FARMCs, nga nagahatag tingog sa mga mangingisda sa pagdumala sang ila fisheries resources.
“FARMCs represent over 240,000 fisherfolk in the region. They play a big role in ensuring that our communities continue to benefit from healthy and well-managed fisheries,” siling ni BFAR Western Visayas director Remia A. Aparri sa iya pambungad nga mensahe.
Ang paghanas nagsunod sa bag-o lang tapos nga FARMC Levels of Development Assessment, nga nagpakita sang mga senyales sang kauswagan- 65 porsyento sang 20 ka targeted M/CFARMCs ang nag-advance na sa isa ukon duha ka lebel. Samtang, 35 porsyento ang nagakaatubang sang mga paghangkat kaangay sang limitado nga dokyumentasyon, kakulangan sa tinawo, kag wala sang dedikado nga office spaces.
“These challenges are not roadblocks but opportunities for growth. A smooth sea never made a skilled sailor,” siling ni Aparri.
Iya man ginpahayag nga ang masunod nga bahin sang programa magadirekta sabat sa mga problema paagi sa mas gin-improba nga support systems kag focused mentoring.
Si Former Chief Aquaculturist Wilfredo delos Santos ang nangin resource person sa paghanas, kon sa diin iya ginpakigbahin ang iya malawig nga eksperyensya sa community-based fisheries management kag FARMC development.
Naghatag man siya ihibalo sa mentoring strategies, pag-organisa sang local councils, kag paggiya sa fisherfolk leaders sa paghibalo sang ila husto nga lugar sa fisheries governance.
Ang paghanas nagbulig man sa FEOs para ila maintidihan ang ila papel bilang FARMC mentors kag sila magiyahan sa pagdihon sang action plans nga santo sa tagsa nila ka LGUs. (AAL/AGP/ PIA 6 kalakip ang mga balita gikan sa BFAR Western Visayas)
