SYUDAD SANG ROXAS, Capiz (PIA) — Nangin madinalag-on ang paglunsar sang Roxas Memorial Provincial Hospital (RMPH), sa idalom sang lokal nga panguluhan sang probinsya sang Capiz kaupod ang Josmef Enterprises sang ila bag-o nga CT-Scan Imaging Service nga nagatuyo nga mas mapasanyog ang ikaayong lawas sang mga pumuluyo kag pasangkaron ang ila mga serbisyo nga ginadul-ong sa probinsya.
Suno kay Dr. Florencio Luching Jr. nga Chief of Hospital II sang RMPH, ang bag-o nga CT-Scan makabulig sa mga doktor kag mga espesyalista sa epektibo nga pagdiagnose kag pagbulong sang mga nagkalainlain nga mga balatian.
Gindugang pa niya nga ang nasambit nga pasilidad ang makabulig agud malikawan na ang pagdala sang mga pasyente sa iban pa nga mga ospital kag hindi na kinahanglan mag gasto pa sang mahal ang mga himata nga natungdan.
Ginpahayag ni Luching nga ang bayad sa CT-Scan examination sa RMPH mangin mas barato kon ikumpara sa mga pribado nga ospital kag institusyon sa probinsya.
Sa pihak nga bahin, ginpaabot man ni Queenie Ajayi nga Vice President for Admin and Finance sang Josmef Enterprises ang ila pagpasalamat sa gobyerno probinsyal sa pakigbuligay sa ila para mas mapasanyog ang healthcare access sang probinsya.
Ang CT-Scan machine makaserbisyo sa tubtob 20 ka mga pasyente sa tagsa ka adlaw nga maga-operate humalin alas-8:00 sa aga tubtob alas-11:00 sang gab-i kag bukas para sa mga inpatients kag outpatients agud mas madamo pa nga makabenepsiyo sa moderno nga diagnostic services sang probinsya. (AGP/PLF/PIA Capiz)
