SYUDAD SANG ILOILO (PIA) — Naghatag ang Bureau of Fisheries and Aquatic Resources (BFAR) 6 sang 30-foot fiberglass-reinforced plastic (FRP) boat sa Pajo Farmers and Fisherfolks Association (PaFFA), isa ka partner-beneficiary sang iya Special Area for Agricultural Development (SAAD) nga programa, bilang suporta sa operasyon sang ila “Lambaklad.”
Ang fiberglass nga baroto ang magahatag sang mas luwas kag mabakod nga palaagyan sa pagbiyahe sang ila mga dakop nga isda ilabi na sa ti-on sang tig-ululan.
Bangud padayon ang operasyon sang asosasyon sa masulod 20 ka adlaw sa tagsa ka bulan, kapin 1,000 ka kilo sang isda ang ila nagakakuha nga amo nagahatag sang kita sa komunidad.
Sa ila nga bahin, ang asosasyon magabutang sang katig sa baroto agud ma-improba ang kalig-on sang bangka kag masiguro ang kaluwasan sa pag gamit sini sa dagat.
Nagpalab-ot man sang pagpasalamat ang PaFFA president nga si Arniel V. Miguel sang turnover ceremony bangud suno sa iya, ang bag-o nga sakayan pandagat ang makabulig gid sa mas maayo nga pagdumala sang ila nga palangabuhian.
“Bangud may 30-footer [FRP boat] na kami, kumportable kag duro makasakay nga mga boso kag makasarang gid sa hampas ka balod,” siling ni Miguel.
Mahibal-an nga ang SAAD Program Phase 2 sang BFAR nagalantaw nga mapanubo ang kaso sang kaimulon kag mapasanyog ang pangabuhi sang mga mangingisda kag ila mga komunidad paagi sa paghatag sang tayuyon nga oportunidad sa palangabuhian kag suporta sa mga pigado nga sektor.
Suno sa BFAR, ang ini nga mga bulig tinutuyo man nga magsanto sa mga banner program sang Department of Agriculture kag magbulig sa mga benepisyaryo sa pagtukod sang community-based fishery enterprises. (AAL/AGP/PIA 6 kalakip ang mga balita gikan sa BFAR 6)
