SYUDAD SANG ILOILO (PIA) — May bag-o na nga traffic scheme nga igapatuman bangud sa natalana nga pagsugod sang phase two rectification sang Ungka Flyover.
Ini ginpahibalo ni Department of Public Works and Highways 6 Regional Director Sanny Boy Oropel sa isa ka press conference nga ginhiwat sang damlag lang.
Iya ginhambal nga ang konstruksyon magapadayon sa idalom sang flyover, amo man nga ang Metro Pacific Iloilo Water nagapadayon man ubra sang ila water pipeline alignments.
“We need much bigger working area for the rectification of the right lane,” siling ni Oropel.
Sang Oktubre 21, ang DPWH 6, Iloilo City Traffic Management Unit, kag Pavia Traffic Management Office nagpatigayon sang monitoring operation para husayon ang traffic measures antes pa ma-implementar ang bag-o nga traffic scheme para masiguro ang kasulhay sang trapiko.
Kaangot diri, ang DPWH 6 nagpaggwa sang advisory subong nga Oktubre 28 para sa realignment sang trapiko sa Ungka Flyover.
Ang mga motorista kag mga pasahero halin sa Iloilo City padulong Pavia ginaabisuhan nga sila mahimo makaagi sa tuo nga linya sang flyover.
Samtang, ang mga motorista naman nga nagahalin sa Pavia kag padulong sa Iloilo City ang mahimo nga mag-agi sa flyover kag magliko sa wala nga bahin agud magamit ang single lane nga nakadesignar.
Nagbilin man sang mensahe si Oropel sa mga motorista kag mga pasahero.
“Give us your understanding and cooperation as far as traffic is concerned because this will only last until December 25,” siling ni Oropel.
Iya man ginhambal nga ang bag-o nga traffic scheme iga-implementar kasubong sang Disyembre 25 nga “deadline” sang Ungka Flyover nga pagabuksan sa full capacity traffic. (AAL/AGP/PIA 6)
