TAGBILARAN CITY, Bohol (PIA) — Gilusad sa Philippine Health Insurance Corporation (PhilHealth) ning bag-o lang, ang ilang digital platform aron mapaayo pa ang paghatod sa universal health care sa mga Pilipino.
Ang mga kadagkuan sa PhilHealth ug sa Department of Information and Communications Technology (DICT) nagtigom sa seremonyal nga paglusad sa ilang Digital Transformation Systems ePhilhealth platform niadtong Hulyo 9 sa kaulohan.
Ang app, nga gidisenyo uban sa Single-Sign-On (SSO) APIs ug nalambigit sa digital national ID, nagtumong sa pag-streamline sa access sa mga serbisyo sa gobyerno nga luwas.
Pinaagi sa paghiusa sa mga serbisyo sa PhilHealth ngadto sa eGovPH app, kini nga inisyatiba nahiuyon sa Ease of Doing Business Act, nga naghimo sa mga transaksyon nga mas sayon ug episyente alang sa mga Pilipino.
Matud pa sa presidente ug chief executive officer sa PhilHealth nga si Emmanuel Ledesma, ang maong plataporma kabahin sa direktiba ni Presidente Ferdinand R. Marcos Jr. sa iyang State of the Nation Address sa miaging tuig aron mapadali ang mga paningkamot sa digitalization.
Samtang si DICT Kalihim Ivan John Uy miingon nga ang mga enhancements naghatag og luwas ug user-friendly nga serbisyo sa gobyerno.
Ang e-PhilHealth nga plataporma nagsentro sa klinikal nga impormasyon, nagpahapsay sa mga proseso ug nagpauswag sa kaepektibo sa tanang tiggamit.
Uban niining mga bag-ong feature, ang mga miyembro sa PhilHealth dali nang maka-access sa bag-ong membership portal nga naglakip sa ilang profile, kontribusyon, benepisyaryo ug bisan sa claims history.
Gawas niini, mahimo na usab magparehistro karon ang mga miyembro sa bisan unsang Konsulta package provider ug mag-aplay alang sa bag-ong membership. (ECB/PIA7-Bohol)
