KAPATAGAN, Lanao del Norte (PIA) — Giinagurahan na ang 1.8-kilometer concrete access road nga dugay nang pangandoy sa mga mag-uuma sa barangay La Libertad, Pulang Yuta, Tulatulahan, Tipolo sa Kapatagan, ug Barangay Calube sa Sultan Naga Dimaporo.
Gitukod kini ubos sa Rural Agro-enterprise Partnership for Inclusive Development (RAPID) Growth Project sa Department of Trade and Industry (DTI) nga gisuportahan sa Department of the Interior and Local Government, ug lokal nga kagamhanan sa Kapatagan.
Tumong niini nga matabangan ang 871 ka mag-uuma sa lubi, nga mas sayon na karon ang pagdala sa ilang mga produkto ngadto sa merkado.
“Usa nga problema o kakulian nga na-experience sa mga mag-uuma, usa ra ana ang dalan. Gawas ana, naa pud mga concerns o issues sa on technical aspect, ato na silang gitagaan og intervention,” sumala ni DTI-10 Regional Director Ruel B. Paclipan.
Tungod sa sementadong dalan, mas dali na para sa mga multi-purpose cooperatives, sama sa Tipolo, Barangay Calube Farmers, Tulatutulahan Farmers, Pulang Yuta Farmers, and La Libertad Farmers, nga matransport ang ilang mga produkto nga kopras ug uling ngadto sa merkado.
“Pinaagi sa programa sa DTI RAPID, nagbukas kini og bag-ong kahigayonan alang sa mas paspas, mas luwas, ug mas hamugaway nga transportasyon,” sumala ni Efren Villacrusis, chairperson sa LALIFAMCO.
Samtang, dako usab kini’g tabang kang Charles Marie Licanda Bade, usa ka inahan ug residente sa La Libertad, kay dili na siya mabalaka sa pagbiyahe padulong sa town proper para magpa-check-up ug manganak.
“Kita nga ginikanan maghunahuna sa ugma sa atong mga anak, ug di ko gusto nga ma-experience sa akong anak ang akong na-experience sauna. Maong dako kaayo among pasalamat nga naa na mi kalsada karon,” sumala niya. (LELA/PIA-10/Lanao del Norte)
