ILIGAN CITY (PIA) — Human sa opisyal nga proklamasyon sa mga midaog sa 2025 lokal nga eleksyon niadtong Mayo 13, misaad ang mga bag-ong napili ug napiling-usab nga mga opisyal sa Iligan nga ipadayon ang ilang paningkamot alang sa kalambuan, maayong panggobyerno, ug panaghiusa alang sa kaayohan sa katawhan sa dakbayan.
Nagpasalamat si Mayor Frederick W. Siao sa Asenso Iliganon Party (AIP) sa mga misuporta nila, ug misaad nga ipadayon ang ilang gisugdan nga maayong serbisyo ug pagdumala.
“Pasalamat ta sa atong mga supporters, sa mga mituo sa ato–sa ilang suporta nga ilang gihatag kanato ug salamat, salamat kaayo ug atong saad nga atong balosan sa maayong panerbisyo, ang atong syudad sa Iligan,” matod niya.
Giklaro usab niya nga padayon nilang pagatubagon ang 15 ka Priority Development Goals nga nagtutok sa mga isyu nga gikinahanglan masulbad aron mas mapaayo ang panginabuhi sa mga Iliganon. Apil sa mga prioridad mao ang pagpalig-on sa serbisyo sa tubig, pagdumala sa basura, kahimsog, ug ang pagtapos sa pagtukod sa bag-ong Pala-o Market.
Samtang mapasalamaton si Ernest Oliver “Wekwek” Uy sa United Iligan Party (UIP), ang bag-ong napiling bise alkalde ug nanawagan sa panaghiusa aron mapadayon ang pag-uswag sa dakbayan.
“Ang kadaugan dili lang makita sa resulta sa eleksyon, apan sa inyong kaisog sa pagbarug para sa tinuod nga kausaban. Dili kini ang katapusan, kondili sinugdanan sa mas lig-on nga pakigbisog alang sa Bag-ong Iligan,” matod niya.
Samtang, naproklamar usab si Cong. Celso G. Regencia sa UIP sa iyang ikaduhang termino isip kongresista sa Lone District sa Iligan. Gisaad niya nga ipadayon ang mga serbisyo ug programa para sa katawhan.
“Padayon ako magserbisyo kaninyo. Walay laing tumong ang inyong alagad kundili ang tinuoray nga kausaban ug kalamboan para sa Iligan. Sa inyong tabang ug panaghiusa, mas daghang proyekto pa ang matuman, ug mas daghang Iliganon pa ang matabangan,” sumala niya.
Giproklamar usab sa City Board of Canvassers ang opisyal nga mga napili nga konsehal sa syudad. Gikan sa UIP mao sila Nhicolle Capangpangan, Ian Uy, ug Randy Ryan Ong. Gikan sa AIP mao sila Derrick Siao, Bong Abragan, Tete Pacaña, Michelle Sweet, Marlene Young, Tatay Huertas, King Belmonte, Ramil Emborong, ug Pisyong Larrazabal.
Gipasidunggan ni Commission on Elections – Iligan City Election Officer Attorney Anna Liza Barredo ang mga bag-ong naproklamar nga kandidato ug nagpahayag sa iyang paglaum nga ilang tumanon ang ilang katungdanan ug alagaran pag-ayo ang katawhan sa Iligan sulod sa umaabot nga tulo ka tuig. (LELA/PIA-10/Lanao del Norte)
