MAGSAYSAY, Lanao del Norte (PIA) — Duna nay bag-ong munisipyo ang maong lungsod human kini giinagurahan.
Duna kini moderno nga disenyo, ug mao kini ang pinakauna nga two-story municipal hall building nga dunay elevator sa probinsya aron maserbisyohan ang mga buntis, mga senior citizens, ug mga persons with disabilities.
Nagsugod ang konstruksyon sa bag-ong munisipyo niadtong 2020 sa pagpangulo ni Mayor Haron D. Omar, Sr., nga gisundan sa una nga alokasyon gikan sa kongresista sa 2nd District nga si Abdullah Dimakuta Dimaporo nga adunay P10 milyon para sa Phase 1. Apan, ang trabaho gipahimutang sa temporaryo tungod sa pandemya sa COVID-19.
Niadtong 2023, naghatag og dugang nga pondo si Sen. Aquilino Martin “Koko” Pimentel III nga P35 milyon pinaagi sa Department of Public Works and Highways nga nakatabang sa pagkahuman sa proyekto niadtong Setyembre 15, 2024.
Sumala ni Omar nga ang tanan nga departamento sa munisipyo adunay kaugalingong opisina aron masiguro ang mas epektibong serbisyo publiko para sa mga tawo sa lungsod. Gibida sab niya ang pag-uswag sa Magsaysay gikan sa usa ka liblib nga dapit ngadto sa usa ka nag-uswag nga destinasyon sa turismo.
“Nakita ang Magsaysay nga nag-uswag ug nagmalambuon. Nakahimo kita og usa ka tourist spot sa Magsaysay, Jardín de Rachma, nga karon usa sa ipasigarbo, dili lang sa probinsya sa Lanao del Norte kundi sa tibuok Mindanao ug tibuok nasod sa Pilipinas,” sumala niya.
Samtang, gipasidunggan ni Department of the Interior and Local Government Lanao del Norte Provincial Director Bruce Colao ang paningkamot sa lokal nga kagamhanan sa pagtukod sa bag-ong munisipyo, nga makahatag og kontribusyon sa good governance ug mas maayo nga serbisyo para sa mga residente. (LELA/PIA-10/Lanao del Norte)
