SYUDAD SANG ILOILO (PIA) — Ginakilala sang Department of Trade and Industry (DTI) ang mga naga-obserba sang patas kag responsable nga mga buhat sa pagnegosyo paagi sa iya Bagwis Program, kon sa diin ginalantaw ang mga negosyo nga nagasakdag sa mga kinamatarong sang mga konsumidor kag nagahatag sang mayad nga serbisyo.
Sa ginpatigayon nga Kapihan sa Bagong Pilipinas (KBP) episode sang Marso 11, ginpahayag ni DTI 6 OIC Assistant Regional Director Mutya D. Eusores nga ang ini nga pagkilala ginahatag sa mga establisyemento nga naga-obserba kag nagasakdag sa kamaayuhan sang mga konsumidor.
Sa Western Visayas, 57 ka mga bag-o nga establisyemento ang nakabaton sang Bagwis Seal of Excellence, samtang walo ka awardees ang na-upgrade sang 2024, nagaserbe nga sulundan para sa patas kag responsable nga mga buhat sa negosyo.
“We continue to campaign on this. Every year, we have a target set for each province, and we help our business establishments during the application process because they are being evaluated by our committee prior to endorsement for the approval of the head office,” pagpahangop ni Eusores.
Ang tanan nga retail nga mga establisyemento mahimo magpasakop sa programa pareho sang magagmay nga mga supermarket, mga grocery store nga nagabaligya sang basic necessities kag prime commodities, mga department store, mga appliance center, service and repair enterprises, mga hardware store, kag mga novelty store nga nagabaligya sang mga pinasahi nga mga butang.
“These establishments are being nominated by our provincial offices by means of monitoring and inspection, seeing to it that they comply with several Fair Trade Laws implemented by the agency such as the Price Act, Suggested Retail Prices, and Product Standards Law, among others,” siling naman sang hepe sang Consumer Protection Division sang DTI 6 nga si Grace Benedicto.
Dugang pa ni Benedicto, may yara 109 ka commodities sa idalom sang Mandatory Certification, nagakahulugan lamang nga ang hardware stores kag appliance centers nga nagabaligya sang mga produkto nga may Philippine Standard Mark kag Import Commodity Clearance ang ginapili kag ginasiguro nga padayon sila nga nagasunod sa mga layi.
Subongman, ang Bagwis Seal nagadirekta man sa mga establisyemento nga magtukod sang Consumer Welfare Desks ukon kaangay sang customer relations office sa sulod sini nga magaserbe nga palaagyan para mahatagan sing madasig nga resolusyon ang mga reklamo kag problema sang mga konsumidor kaangay sang expired items kag warranties, amo man magaserbe nga source sang impormasyon para sa mga kustomer. (AAL/AGP/PIA 6)
