Gipanguluhan ni Bais City Mayor Luigi Goñi (ika-6 gikan sa wala) ang paghatag og ICT equipment sa 35 ka barangay sa turnover ceremony niini niadtong Enero 8, 2025 sa Bais City Training Center. (KAT/PIA7-Negros Oriental)
BAIS CITY, Negros Oriental (PIA) — Nanguna ang Local Government Unit (LGU) sa Bais City sa pagpanghatag og kompyuter ug uban pang ekipo ngadto sa 35 ka mga barangays pinaagi sa mga barangay captains dinhi.
Kini nga mga ekipo, alang sa ipahigayon niini nga “Barangay Aggregated Information System (BAIS).”
Kini usa ka “data collection system” na gigama sa lokal na kagamhanan.
Mao usab kini ang tubag sa Bais City government sa awhag sa Commission on Population and Development sa matag Local Government Unit (LGU) nga maghimo og kaugalingon nga “Registry of Barangay Inhabitants and Migrants (RBIM).”
Kolektahon sa barangay secretary ang “basic demographic information” sa mga residente og iya kining i-encode sa system nga konektado sa database sa city hall.
Matod ni Bais City Mayor Luigi Goñi, gitinguha sa LGU na makab-ot ang “data-driven approach” sa pagplano sa mga programa sa siyudad ug sa paghalad og serbisyo sa katawhan.
“Kanang mohatag og support sa certain nga sector like mga single mom or atong pedicab drivers, mga ingon anang sector kana if masulod na tanan data (sa system), usa ka pindot nimo kabalo na ka asa sila bulongon. Dili na ka maglisod asa, kinsa ang intended na mga recipients,” matod ni Goñi.
Gibutyag usab ni CPD Executive Director Usec. Lisa Bersales nga ang Bais City maoy labing unang LGU na nanghatag og kompyuter sa mga barangay alang sa pagpatuman og RBIM.
“Only about 4 percent of all barangays in the Philippines have RBIM. Si Bais City is an example of a city that provided 100 percent infra and hardware as well as the system itself so unique siya. In some areas one or two barangays lang tapos hindi naman nag-provide ang city ng hardware,” matod ni Bersales.
Dugang pa niya, ang tumong ug tuyo sa RBIM na makolekta ang datos sa mga aktwal na molupyo ug mga “migrants” o mga langyaw na nibalhin og puy-anan sa maong barangay.
Gawas sa data collection, naa usab kapasidad ang mga ICT equipment na makaprinta og ID ug mga certificate na iisyu sa mga barangay aron dili na sila kinahanglan pa moadto sa City Hall para makakuha niini. (RAL/PIA7-Negros Oriental)
