Gipanalanginan ang demonstration room alang sa barista training sulod sa bag-ong Bais City Training Center didto sa Barangay Consolacion kaniadtong ika-10 sa Enero, 2025. (RAL/PIA7-Negros Oriental)
BAIS CITY, Negros Oriental (PIA) – Gibuksan sa lokal na kagamhanan sa Bais City ang ilang kaugalingong skills training center nga nahimutang sa Barangay Consolacion.
Ang bag-ong pasilidad, adunay lecture rooms, demonstration rooms, dormitory, conference hall, ug CCTV monitoring area sa tulo ka andanang building sa Bais City LGU.
Gibutyag ni Community Training and Employment Officer Bemar Torres nga gi-asikaso na karon sa LGU ang pagpa-accredit og training programs sama sa barista, housekeeping servicing, computer systems servicing, driving ug food and beverage sa TESDA para masugdan na ang pag-training sa mga Baisanon.
“Once this training center is fully operational, accredited by TESDA tanang training dire is free for Baisanons,” matod ni Torres.
Giplano sab sa LGU ang pagpahigayon og training sa sugarcane production, shielded metal arc welding, and heavy equipment operation nga mapuslan sa mga Baisanon aron makatrabaho sila dayon sa Central Azucarera de Bais.
“The role of the LGU and the industry is naay coordination para ma-identify nato unsa ang ilang kinahanglan para ang taga-Bais dili na kinahanglan moadto pa sa laing lugar para ma-secure nila ang usa ka training and NC. Dinhi lang mismo sa Bais,” dugang pa niya.
Gipanguluhan ni City Mayor Luigi Goni kauban ang ubang opisyal sa siyudad ang pagbukas sa nasampit nga pasilidad. (RAL/PIA7-Negros Oriental)
