Bakuna Eskwela in Batan, Aklan. (Photo courtesy of Batan RHU)
KALIBO, Aklan (PIA) — Padayon nga nagahiwat it school-based immunization (SBI) ro Provincial Health Office iya, kaibahan ro Department of Health Western Visayas Center for Health Development ag Department of Education-Aklan, nga kung siin tuyo nga mabakunahan ro 24,133 ka mga estudyante sa Aklan.
Ro school-based immunization program, nga ginatawag man nga “Bakuna Eskwela” handum nga maprotektahan ro mga inunga kontra sa mga vaccine-preventable diseases kaparehas it Measles-Rubella (MR), Tetanus Diphtheria (Td), ag Human Papillomavirus (HPV), ag dayon man maabangan ro pagtuhaw it mga disease outbreak.
“Ro rayang inisyatibo (SBI Program) hay isaea sa aton nga mga importante nga tikang para masigurado ro health and well-being it atong mga inunga kontra sa mga masakit nga posibleng magresulta sa nga komplikasyon ag pagkamatay,” hambae ni Dr. Sarah Marie Huyong, Provincial Health Officer I it PHO-Aklan.
Gindugang man nana nga ro probinsya hay dag-unan nga ginahiwat ro SBI, ugaling sa haring dag-on hay espesyal tungod nga gin-integrar ro pagbakuna kontra sa HPV para sa mga grade four nga mga bayeng estudyante, para sanda maprotektahan sa cervical cancer.
“Kada pagbakuna hay may importante nga papel sa pagprotekta indi eamang sa indibidwal nga mga inunga kundi para sa komunidad para sa kabilugan,” suno kay Huyong.
Base sa report it PHO-Aklan, handum it probinsya nga mabakunahan kontra MR and Td ro 8,785 ka mga estudyante halin grade one ag 10,085 nga halin mat-a sa grade seven.
Suno kay J-Lourenz Dionisio, Nurse III ag National Immunization Program Manager it PHO-Aklan, sa harang Oct. 18, 2024, may kabilugan 4,725 mga grade one nga mga estudyante ukon 53.78 porsyento it target nga populasyon ro nabakunahan eon; samtang 29.28 porsyento it grade 7 ukon 2,953 ro nakabaton eon it booster doses kontra MR and Td.
Sa 5,263 grade four nga mga inunga nga tuyo mabakunahan kontra HPV, may 2,178 ukon 41.38 porsyento eon ro nakabaton it nasambit nga proteksyon.
“Ro amon nga pagkomitar sa pagtao it mga bakuna nagasaeaming sa amon nga dedikasyon sa pagtao it ikaayong eawas it mga estudyante ag pagtao it haega sa importansya it pag-abang ag pagtapna. Hambae gani nanda, prevention is better than cure,” pagpaathag ni Dr. Huyong.
Samtang, ginpasigurado ni Dr. Jose Martin Atienza, Medical Officer III ag Immunization Program Coordinator it DOH WV-CHD, ku pagprovincial kick off it Bakuna Eskwela sa Aklan nga ro mga bakuna nga ginagamit sa national immunization program it gobyerno hay ginpamatud-an eon nga euwas ag epektibo.
“Ro bakuna nga ginatao sa national immunization hay subok eon ag masobra ap-at nga dekada eon nga ginagamit. Ro atong bakuna ay euwas ag dekalidad, nag-agi sa maid-id nga pagtuon it Word Health Organization, aprobado it Food and Drugs Administration, ag pinakamataas nga kalidad base sa standard it DOH,” eksplikar ni Atienza.
Ginnotahan man nana nga ro tayuyon nga pag-implementar it SBI hay makaestablisar it euwas nga komunidad, mapamayad ro herd immunity, makaprotekta sa mga inunga, ag makatapna sa outbreak it mga kaso it mga vaccine-preventable diseases. (AGP/SQP/PIA Aklan)
