CLARIN, Bohol (PIA)—Nahiluna na gayud sa ilang ika unom na nga pagbalhin, sila Mauro 68 anyos ug Necifora Omaña (71 anyos) mag-tiayon nga manimuyo nga sila na lamang duha human nangaminyo na ug naglain nag puyo ang ilang walo ka mga anak.
Gikasal niadtong 1977 tungod sa gugma, nakatukod og balay ang magti-ayon didto sa Poblacion Clarin, apan, sa kalisud sa kinabuhi didto sa lungsod, nakahukom ang banay nga mobalhin na sa bukid, diin mas barato ang pagpuyo, ug makapanguma pa.
Nahugno na lang ang ilang balay sa bukid sa ka gabok, hangtud nga uban sa mga bata, nagbalhinbalhin na kini og puyo sa ikatulo ngadto sa ika upat nga balay nga ilang pasilongan samtang nag-uma sa bukid.
Nagpabilin pang tiunay ang gugma sa magtiayon.
Tuig 2006, sa ilang dyutay nga tinigum, nakapatukod na gyud kini sila og kaugalingong balay nga semi concrete, apan sa wala damhang panghitabo, halos maapil og ka ugdaw si Necifora, diha nga nasunog ang ilang balay nga hinagoan, adlaw nga daku.
Paig ug naabo usab ang ilang mga napundar nga mga kabtangan nga nakaipsot sila sa gihanteng daub, tapot lawas lamang.
Maayo na lang usab kay ang magti-ayon nga Omaña, nakit-an sa mga Kapolisan sa Clarin nga mga maayong tawo ug kaabag sa balaod, mao nga natumbok kini nga makabenepisyo sa proyeto sa kapolisan inabagan sa nag-unang magti-ayon: Aris ug Vanvan Aumentado kinsa nagtagana og bahin sa ilang mga personal nga kinitaan, aron may pundo ang Libre nga Alagad og Balay (LAB).
Proyekto nga gipahaum sa programa sa kasimbayanan sa kapulisan, ang LAB, matud ni Bohol Police Chief Lorenzo A. Batuan, ihatag ngadto sa mga kabus ug mahadlokon sa balaod, apan wala nay kadangpan pa aron makabalay.
Mismo si Gob Aumentado, kauban ni Batuan, Police Community Affairs and Development Unit chief Lt. Col. Norman Nuez, Clarin chief Lt. Amado Amba Jr, ug mga barangay officials nga maoy mongboluntary aron mapabatug ang desente nga Balay sa mga Omaña.
Kini na usab ang ika 36 na nga Libreng Balay nga gitunol sa kapolisan ngadto sa banay nga Omaña. (RAHC/PIA Bohol)
