TAGBILARAN CITY, Bohol (PIA) — Malampuson nga gipahigayon sa Bohol Provincial Police Office (BPPO) ang Police Media Relations, Media Management ug News Writing Seminar Workshop uban sa 48 ka mga chiefs of police, mga public information officers ug nga social media handlers sa mga estasyon sa kapolisan, nga gidumala sa Bohol Tri-Media Association ug sa Philippine Information Agency (PIA), didto sa Ceremonial Hall sa Kapitolyo, Hulyo 17.
Matud ni BPPO Police Community Affairs Development Unit, Police Lt. Col. Norman Nuez, ang programa nga gipatuman ubos sa pagpangulo ni provincial director Lorenzo Batuan, gipahaum nga kalihukan sa Police Community Relations Month.
Usa sa mga dagkong hisgutanan sa kapulisan ug sa mga sakop sa media mao ang pagka-kuwang sa sinabtanay sa mga sakop sa kapolisan ug sa bahan sa media, nga resulta usab sa puparehas nila nga mga mandatus: pagpangalagad ug pagpanalipod sa katawhan; alang sa kapolisan ug ang pagpadayag sa kamatuoran nga maoy gimbuhaton usab sa media.
Nahimong lisud kini nga sitwasyon diha nga sa mandu sa kapolisan nga panalipdan usab ang pangalan ug dungog sa mga katawhan, sa pagpatunhay sa maayong imahen sa kapolisan ug sa pagpatunhay sa kahapsay ug kalinaw, may nga kasilo sa media nga mamugos sa kapolisan sa pagpabutyag sa mga sensitibong impormasyon nga mahimong ikadaut sa mga katawhan.
Hinumduman nato kanunay nga ang kapolisan gimanduan sa pagpanalipod sa katawhan, lakip na niana ang pagseguro nga walay tawo nga mahukman na daan nga sad-an bisan wala pay tukmang paghusay ug pagdungog sa haum nga korte, matud ni Nuez.
Matud sa PIA, sa dagan sa pagpa-ambit sa kasayuran, kanunay usab hinumduman nga bisan kon ang katawhan may batakang katungod sa saktong kasayuran, kini gigamhan usab sa mga balaod nga mahimong magamit aron walay ngalan ug dungog nga mayatakan.
Kon may katungod ang media nga mamugos pagpangayo sa mga identity sa mga madakpan, may katungod usab ang kapolisan nga likayan ang possible nga silot dala sa sobra nga paghatag sa kasayuran nga makadaut na hinuon sa pangalan ug dungog sa tawo.
Gawas sa batakang katungod nga dili pwede matawag og criminal kon wala pa kahukmi sa gitugyanan nga korte, nga dili pwede mapahukman sa katawhan kon wala pay pagdungog sa sumbong, gitamud na usab karon ang nga probisyones sa freedon of information law ug sa Data Privacy law, nga maoy basehan sa pagpa-ambit sa kasayuran.
Kini maoy unod sa us aka adlaw nga pagbansay sa media ug sa kapolisan pagpalig-on sa ilang relasyon alang sa mas maayo pa nga serbisyo ngadto sa komunidad. (RAHC/PIA Bohol)
