TAGBILARAN CITY, Bohol (PIA)— Gibuksan ang hinugna nga mga bansaybansay ug mulungtad pa sa napulo ug usa ka adlaw ang paggahum sa mga barangay officials aron mas mahimo silang takus sa ilang mga responsibilidad.
Sa pagbukas nga kalihukan didto sa Bohol Cultural Center nga gitambongan mismo ni Gobernador Erico Aristotle Aumentado, nagkatapok ag nga barangay opisyales gikan sa Loon ug Calape, ug kini gilangkoban sa mga Barangay kapitan, duha ka mga barangay kagawad nga naghupot sa Komitiba sa Appropriation og environment, barangay treasurers, presidente sa Barangay Health Workers associations ug ingon man chairman sa Sanguniang Kabataan.
Sa pakigpulong, si Aumentado nagkanayon nga “Kining mga paningkamot sa pagpalig-on sa kapasidad importante sa pagpalambo sa mga may katakus nga mga lider nga makatampo sa kinatibuk-ang kaayohan ug pag-uswag sa ilang mga komunidad.”
“Adunay panginahanglan sa pagpausbaw sa kahanas sa pagdumala sa mga opisyal sa Barangay, isip mga frontline sa lokal nga pagdumala, ug ubay niini ang panginahanglan sa sa mga konstituwente sa pag-pangalagad nga epektibong ilabi na sa pagsulbad sa Lokal nga mga isyu,” dugang sa gobernador.
Subay niini, ang capacity building nagtumong aron pagpahinumdum ang mga opisyales sa ilang mandato mahitungod sa maayong pagpadagan sa kagamhanan, pagkadayag ug andam manubag, pagdumala sa kalikopan, ingon man mga pagtuman sa mga polisiya sa maayong financial management sa kagamhanan.
Ang kalihukan gisugdan sa Novembre 25-27 hangtod sa December 2-4 og 9 matapos sa petsa 17. (RAHC/PIA Bohol)
