Kini nga kinaiya kay nasayangan sa baboy iyawat na lang makabawi sa tahop, mao na usab hinuon ang kina-ingnan sa pagkatag sa ASF, nga may kapasidad nga mopuo sa mga baboyan dinhi sa Bohol, matud ni Dr. Domino Bayorn, benerinaryo. (PIA Bohol)
TAGBILARAN CITY, Bohol (PIA) – Dili maayo nga bansay ang pagtiwas sa mga mananap, dala sa kasayang nga mamatay ra kini nga dili na hinuon kapuslan.
Kini maoy pahayag sa usa ka benerinaryo sa Office of the Provincial Veterinarian (OPV), Dr. Domino Bayron, kinsa nagtuo nga ang usa sa mga hinungdan sa pagkatag na hinuon sa sakit, mao ang kinaiya nga tiwasan ang nasakit nga mananap ug paambitan sa mga silingan, aron iyawat makabawi sa nagasto na nga pagkaon sa hayop.
Didto sa Kapihan sa PIA, gipadayag ni Bayron, kinsa usa sa mga beterinaryo nga madeploy sa mga barangay nga may mga taho sa pagpangamatay sa mga baboy, nga ang pagpangtiwas sa mga nasakit nga baboy, magdugang sa trabaho sa mga tinugyanan nga nagpugong sa pagkatag sa sakit.
Niadtong miaging buwan, ang gikataho nga pagpangamatay sa mga baboy didto sa San Vicente San Miguel, Bohol, nakompirmar nga tungod sa nakasulod nga African Swine Fever (ASF).
Ug samtang, segun sa lagda sa Department of Agriculture (DA) sa mganahauna nga memorandum niini, sa higayon nga may makompirmar nga positibo sa kagaw sa ASF ang sample sa dugo sa baboy nga nangasakit, ang tanang baboy sulod sa 100 ka metros nga nagpalibot sa baboy nga nangasakit, kinahanglang hiposon, aron wala nay kaagi-an pa ang kagaw nga makagawas sa lugar.
Dinhi, samtang wala pay kompirmasyon ug ang dugo nga sample gituki pa sa mga laboratory, daghan ang namuhi og baboy sulod sa 100 ka metros nga masayangan sa ilang binuhi, hinungdan nga aron masapi pa, dali kini nga ihawon, karnehon ug paambitan.
Sa higayon nga ang baboy natakdan na sa kagaw, ang matag tulo sa dugo, tubig nga ihugas niini, u gang karne, mahimo na nga carrier sa kagaw, ug kon dalhon kini gawas sa 100 ka metros nga kinahanglan wala’y baboy nga buhi man o karne nga pasudlo ug pagawason, madala niini ang kagaw pagawas.
Kini na usab karon ang mamahimong hinungdan sa pagkasakit sa mga baboy nga matakboyan sa nadala nga kagaw.
Dili man makadaut sa tawo ang pagkaon sa karne sa baboy nga nasakit sa ASF, ang hunahuna nga nagkaon ka sa karne nga may sakit, ug ang posibilidad nga kini magdala og sakit nga makapanakod sa mga baboy sa imong palibot, igo na unta nga pahimangno nga undangon na nato ang pagpangtiwas, aghat ni Dr. Bayron. (RACH/PIA7 Bohol)
