KALIBO, Aklan (PIA) — Nag-establisar ag opisyal nga naglunsar sa Nabas, Aklan it primerong Barangay Information Officers (BIOs) network sa Western Visayas.
Paagi sa Philippine Information Agency-Aklan, ginlunsar ro BIOs network kaibahan ro Aklan Public Information Officers Association (APIOA) sa Mayor’s Office Conference Room it Municipal Hall sa Poblacion, Nabas.
May kabilugan 20 mga empleyado ag mga opisyal halin sa pilang mga barangay ro ginpahueag bilang BIO sa pagsuporta sa ginatumod it PIA nga mapabahoe ro network of development communication sa grassroots nga lebel nga makabulig sa pagpabaskog sa pagpasayod it mga serbisyo, programa, ag proyekto it gobyerno.
Ro designation it 20 sekretarya ag kagawad it mga barangay sa Nabas bilang BIO hay suportado it executive order nga ginpaguwa it andang mga kinaiya nga mga punong barangay.
Si information officer Sheila Q. Patoza it PIA-Aklan nagtao it overview it papel ag ueobrahon it isaea ka BIO ag ro rason sa pagpatukod it harang network.
Gin-eksplikar man nana nga may ina gid man nga “information gap” sa tunga it mga tawo ag nasyonal nga gobyerno, ag sa pagsabat sa rayang bae-at, hay kinahang-ean ro pagkre-ar ag pagbutang it grassroots information frontliners ukon BIOs.
“Kinahangean gid nga mag-establisar it iseang ka network it barangay information officers agud masiguro ro pagpaeapna-ag it mga proyekto, programa, kag serbisyo it gobyerno paagi sa mga nagkasari-saring media platform. Raya nga mga BIO ro mangin opisyal nga baba ag pagaboe-an it matuod nga impormasyon, sa bahin it pagpaeapna-ag sa komunidad halin sa lebel it barangay paadto sa munisipyo, probinsya ukon syudad, ag sa nasyonal nga lebel, ag vice versa,” hambae ni Patoza.
Sa ngaean ni Nabas Mayor Maria Fe Lasaleta, gintambungan ni Sangguniang Bayan Member Godofredo B. Sadiasa ro nasambit nga kahigayunan ag ginpanginbulahan ro mga bag-ong nakre-ar nga mga BIO.
“Nalipay gid ako nga mabatian nga raya ro pinakauna sa bilog nga probinsya it Aklan nga makaagum kita it mga barangay information officers. Base sa atong eksperyensya sa lokal nga panggobyerno, kaeabanan sa makara nga ginakre-ar nga grupo, nagiging “excited” eang kita sa primero, pero kalimitan sa mga gina-obra naton nakakalipatan. Naging “excited” eang kita, indi ninyo pagkalipatan nga pila eang kamo nga ginpili. Bilang pila ka mga ginpili, pamatud-i ninyo inyong haega, ubrahon ninyo ro inyong pinakamayad nga masarangan sa pagpahisayod sa publiko,” hambae ni Sadiasa.
Dugang pa nana nga sa makaron nga tyempo, ro impormasyon hay madali eang nga mapabaliskad eabi na sa paggamit it mga social media platform kapareho it Facebook, ngani, ro importansya it mga BIO sa komunidad hay kinahang-ean, ag ana man ginpadumdom sa mga information officers nga para indi sanda mapirde, dapat sanda pirme magdampig sa kamatuoran, dahil ginpamatuoran it history nga ro kamatuoran hay pirme gid gaguwa.
Samtang, naghimo man it pledge of commitment ro mga grassroots communication frontliner, sa pagpanguna ni LGU-Nabas information officer Reynard M. Dela Cruz.
Ginhangkat nana ro mga BIO nga batunon ro nasambit nga papel miskan nga maabo eon ro mga trabaho nga nakaangot kanda.
“Pangabay gid nga batunon ninyo ro rayang trabaho dahil ginsaligan gid kamo it inyong punong barangay, para magdeliber it nakaigo, tama, ag ensakto nga impormasyon. Kabay pa nga mangin maging baba kamo ag maging mata it inyong kabarangayan, indi sa pulitika kundi sa husto nga paagi sa pagserbisyo sa pumueoyo,” hambae nana.
Sa imaw man nga kahigayunan, gintigayon man ro induction/oathtaking it bag-ong napilian nga mga opisyales it APIOA. (AGP/SQP/PIA Aklan)
