SYUDAD SANG ILOILO (PIA) — Ginsuguran na ang pagsaulog sang Palayag Festival nga ginapangunahan sang lokal nga pamunuan sang Buenavista sa bahin sang probinsya sang Guimaras.
Naangot sa tema nga Balik Layag: Our History, Our Dream, Our Future ang selebrasyon nga nagatuyo sa paghatag inspirasyon sa pagbinagbinag sang ginhalinan kag pagpabugal sang madinuwagon nga kultura sang banwa sang Buenavista.
Bilang isa sa mga coastal municipalities, ginakabig ang Palayag Festival nga isa ka pasidungog sa mga katigulangan nga nangisog sa paglayag sa kadagatan kag nagbutang sang pundasyon sang masinadyahon nga komunidad nga ginapalangga sang katawhan.
Suno sa lokal nga panguluhan sang Buenavista, nagasimbolo ang tinaga nga “palayag” bilang kolektibo nga pagtinguha sang pag-uswag kag paghiliusa.
“Our Palayag celebration is a reminder for all of us that maybe it’s high time that we adjust our sail in order to reach our destination. Kag ano ini nga destination? Ang destination sang kada isa, tanan nga pumuluyo sa Buenavista in particular, and tanan nga pumuluyo sang Guimaras, in general, amo ang malab-ot ang aton masanag nga palaabuton, ” pahayag ni Vice Mayor Cyril Beltran.
Nalakip sa mga aktibidad nga gin-aman amo ang Fun Run, Parade, Barangay Float Competition, Agri-Trade Fair Exhibit, Lin-ay sang Buenavista, Pinta Layag, Palayag Job Fair, Mini Paraw race, Cultural Culinary Expo, Youth Night, Cultural Presentation, kag Sports Competition.
Bukas ang Palayag Festival tubtub Enero 19, 2025. (AAL/PIA-ILOILO/LMLE)
