SYUDAD SANG ROXAS, Capiz (PIA) — Ginpasidunggan sang Department of the Interior and Local Government ang banwa sang President Roxas bangud sang talalupangdon nga mataas nga hinimuan sang Anti- Drug Abuse Council sang banwa sa ADAC Performance Audit and Awards sadtong Disyembre 11 sa Manila Hotel.
Nahibaluan nga personal nga ginbaton ni Mayor Receliste Escolin sang banwa sang President Roxas ang pasidungog kaupod sanday direktor Juan Jovian E. Ingeniero sang DILG 6 kag direktor Cherryl P. Tacda sang DILG Capiz.
Nagpaabot naman sang pagpasalamat si Escolin sa mga grupo nga nagsuporta kag nagbulig agud nga mabaton ang pagkilala.
Ang President Roxas ang naga-isahanon nga awardee nagikan sa probinsya kag isa sa 188 ka mga ADAC sang kaprobinsyahanan, kabanwahanan, kag syudad sa bug-os nga Pilipinas nga nakabaton sang nasambit nga pagkilala.
Kaangot sa pasidungog, nagbaton man ang banwa sang P150,000.00 nga kantidad agud nga magamit sa mga hilikuton nga naangot sa pagtapna sang paglapta kag paggamit sang ginadumilian nga droga.
Ang inisyatibo sang DILG sa bulig sang PNP, Dangerous Drugs Board, Philippines Drug Enforcement Agency, kag Association of Anti-Drug Abuse Coalitions of the Philippines, Inc. ang nagatuyo nga mapasiguro nga ang mga ADAC sa lokal nga lebel ang nagahulag kag epektibo sa pagpatuman sang nagkalainlain nga mga aktibidades batok sa ginadumilian nga droga. (AGP/AAL/PIA Capiz/Cover Photo nagikan sa DILG Capiz)
