SYUDAD SANG ILOILO (PIA) — Ang banwa sang Tubungan ang ginpasidunggan sang 2024 Gawad Parangal Award sang National Task Force to End Local Communist Armed Conflict (NTF-ELCAC).
Ginbaton ni Mayor Roquito G. Tacsagon kaupod ang pinuno sang Public Employment Service Office sang banwa nga si Emelyn Tano ang plake sang pagkilala sa tion sang selebrasyon sang 6th Founding Anniversary sang NTF-ELCAC nga ginhiwat sa Kampo Aguinaldo.
Ini nga pasidungog nagahighlight sa mga dalayawon nga pagpanikasog sang Tubungan sa pagsulong sang pag-isa, paglab-ot sang inclusive peace kag pagpalapnag sang tayuyon nga kauswagan sa idalum sang Whole-of-Nation Approach.
Ginpakita man sini ang commitment sang mga opisyal sang banwa sa Retooled Community Support Program sang panguluhang nasyunal sa ila pagpanguna sa mga inisyatibo nga nagapalapnag sang kalinong kag kasanyugan sa komunidad.
Ang kadalag-an sang lokal nga panguluhan sang Tubungan gina-attribute man sa pagbinuligay kag suporta sang mga tagsakdag. Kalakip sa sining mga nagapanguna nga collaborators amo ang 61st Infantry Battalion, 3rd Infantry Division kag 301st Brigade sang Philippine Army, Department of Education, Iloilo Provincial Government, Civil Society Organizations kag iban pa nga katapo sang RCSP.
Ini nga grupo ang nagpatuman sang mga stratehiya nagatuyo sa pagsabat sang mga mayor nga kabangdanan sang insurhensiya samtang ginatib-ong ang komunidad. Kalakip sa sining mga inisyatibo amo ang pag-integrar sang mga programa palangabuhian, suporta sa edukasyon, kasanyugan sa infrastruktura kag mga pagpanikasog kaangut sa resolusyon sang binangigay ukon konplikto.
Nagpatigayon man ang lokal nga panguluhan sang mga diyalogo sa komunidad kag mga development-oriented project nga nagkuha naman sang pagsalig kag kooperasyon sang mga lokal nga residente kalakip ang mga anay rebelde. (AAL/LAF/PIA6-Iloilo)
