Ang presidente kang Hamtic BIO Network nga si Sheila May Silava nagpasalamat sa paghiwat kang BIO forum kaimaw ang PhilHealth Antique sa mga miyembro kang Barangay Information Officers tungod iba kananda wara pa nakarehistro sa PhilHealth. (Litrato: PIA Antique)
SAN JOSE, Antique (PIA) — Nagpatigayon ang Barangay Information Officers (BIO) Network ka banwa kang Hamtic kang Barangay Information Officer’s Forum kaimaw kang PhilHealth Antique sa Liga ng mga Barangay Session Hall, Hamtic, Antique katong Abril 7.
Gindayaw ni Liza Joyce Songcayawon kang PhilHealth Antique ang dya nga inisyatibo bilang paagi sa pagtugro kang impormasyon sa mga katawhan paagi sa BIO Network.
Ana man ginpaathag ang pinakaurihi nga PhilHealth packages, samtang ginapangabay ang mga BIOs nga dya ipalapnag sa anda mga kasimaryo.
Ginhambal na man ang mga proseso kang pagparehistro online kag ang pagtaas sang benepisyo sa packages kang PhilHealth nga nag-umpisa kang Enero 2025.
Dugang na pa, ang KonSulta services nagatugro kang libre nga check-up kag laboratory tests nga maagum sa mga pampubliko nga hospital kag Rural Health Units sa Antique.
Ginataw-an importansya kang PhilHealth ang pagpamiyembro ka tanan nga katawhan kag ang pagbayad kang kontribusyon kang mga kwalipikado nga miyembro agud masiguro ang tayuyon kag dekalidad nga serbisyo para sa ikaayong lawas.
Samtang, ang Philippine Information Agency nagdayaw sa dya nga lihuk kag sa pagpanikasug kang mga barangay secretary nga amo man gindesignar nga BIO.
Ang presidente sang BIO Network nga si Shiela May Silava kag ang presidente kang Association of Barangay Secretaries nga si Ma. Linde Tayo nagpasalamat para sa nasambit nga forum, nga sanda nakahinun-anon sa PhilHealth. (AGP/PSM/PIA Antique kaimaw ang mga balita halin kay VGT/DOLE Intern)
