ILOILO CITY (PIA) – Nagpasalig ang bag-o nga gindesignar nga barangay information officers (BIOs) sang Passi City sa probinsya sang Iloilo nga pabaskugon ang grassroots communication sa ila komunidad, kung sa diin ginahatagan nila sang pagtamod ang kinahanglanon nga ipalab-ot ang importante nga mga impormasyon tubtob sa lebel sang barangay.
Suno kay Connie S. Monguez, presidente sang Federated Barangay Information Officers sang Passi City, ginakilala sini ang ila mga papel bilang tigpamaba sang ila komunidad, ilabi na sa pagpalapnag sang mga polisiya, proyekto, kag programa sang syudad.
“Thank you so much because we will be equipped with knowledge in proper information dissemination and this is very useful. We will cooperate with this for the greater heights of Passi City,” siling ni Monguez nga sekretarya man sang Brgy. Punong, sa ginhiwat nga BIO network orientation nga ginpatigayon sang Philippine Information Agency (PIA) – Iloilo Information Center, kaupod ang Department of the Interior and Local Government (DILG)-Iloilo kag City Information Office sang Passi City sang Oktubre 9, 2024.
Ginpahayag naman ni Angie P. Gregas, bise presidente sang organisasyon, nga ang ila mga posisyon bilang BIOs magahatag sa ila sang dugang nga ihibalo kag ikasarang sa paghibalo sang mga peke nga balita kag sa pagpaalinton sang matuod nga impormasyon sa komunidad.
Ang mga bag-o napilian nga opisyales sang BION sa Passi City nagsumpa sa atubang ni Vice Mayor Mayor Elyzer Chavez, kung sa diin ginpahayag man sini ang importansya kag positibo nga epekto nga mahimo sang bag-o nga gintukod nga organisasyon sa komunidad.
“This is the first time that they convened to form an organization like this. It is a great help for the community so that all the information can be channeled down to our constituents. This will also help in addressing wrong or fake information to circulate in the barangays,” siling ni Chavez.
Nagpabutyag man sang suporta si CIO head Mae Buenaflor sa pagpatuman sang barangay information officer network kag ginkilala ang ila papel bilang kaupod sa pagpalapnag sang impormasyon may kaangtanan sa mga programa kag serbisyo sang syudad tubtob sa lebel sang barangay.
“This will help us provide timely, accurate, relevant and truthful information to the public. You are the representatives of the barangay as information officers, so we should give accurate information to the community. You are our extension and we work hand in hand to disseminate truthful information,” pahayag ni Buenaflor.
Nagpasalaman man si PIA-Iloilo Government Information Center Coordinator Lilibeth A. French sa LGU paagi sa ila CIO kag sa mga opisyales sang barangay sa ila suporta sa programa, nga nagapasiguro nga ang mga proyekto, hilikuton, kag serbisyo sang gobyerno ginapaalinton tubtob sa mga komunidad.
Sa pihak nga bahin, ginpahayag ni PIA-Iloilo information officer II Liez’l Marie L. Ejeda ang importansya sang pagtingob sang isa ka network sang mga community-based information officers agud mas mapalapnag ang ang mga proyekto, programa kag serbisyo sang gobyerno sa mga pumuluyo.
Ginpahibalo man sang DILG-Iloilo LGOO VI Laura Lynn Cabarga ang mga barangay officials sa mga probisyon sang DILG Memorandum Circular No. 2017-165, nga nagahatag sang framework kag nagamando sa mga Punong Barangay sa pagdesignar sang mga BIO.
Samtang, bilang kabahin sang “Hinun-anon”, ang mga tiglawas nagikan sa Department of Information and Communications Technology (DICT), nagpresentar sang ila eGov application, nga nagatuyo sa paghatag kasayon sa publiko sa pag-access sang mga serbisyo kag impormasyon sang gobyerno online; kag ginhatagan sang kinaalam ang mga pumuluyo natuhoy sa importansya sang cybersecurity. (AAL/JNH/PIA Iloilo)
