SYUDAD SANG ILOILO (PIA) — Gindeklarar nga kampyon sa ginhiwat nga Pantawid Pamilyang Pilipino Program (4Ps) Exemplary Children Regional Search 2024 ang katorse anyos nga si Kenneth John D. Egay sang syudad sang Sagay sa probinsya sang Negros Occidental.
Ginlutos ni Egay nga may inborn visual disability ang anum ka iban pa nga mga pumalasakop humalin sa nagkalain-lain nga probinsya sang rehiyon sa paindisdindis nga ginhiwat sang SM City Iloilo sang Septyembre 25, 2024 nga ginpatigayon sang Department of Social Welfare and Development (DSWD) Field Office VI pinaagi sa 4Ps.
Ginbaton ni Egay ang plake kag kas nagabalor P10,000.00 sa tion sang awarding. Si Egay ang ikatatlo sa apat ka mag-ulutod. Waay sapayan sang kasablagan, indi ini nangin upang sang iya handom nga makabutho ilabi na sang ang ila panimalay ang nalakip sa mga benepisyaryo sang 4Ps. Sa karon si Egay ang isa ka Grade 9 regular class student sa Bato National High School kag isa sa tatlo ka mag-ulutod nga ginamonitor sas idalum sang program.
Ang duha ka iban pa nga nagapanguna nga tagdaug amo sanday Arman Rach N. Daquira sang Panitan, Capiz (1st Runner-up) nga nagbaton sang P8, 000 kas kag Marc Jairel T. Ong sang Tubungan, Iloilo (2nd Runner-up) nga nagbaton sang P5, 000.00. Samtang sanday Johnny N. Prudente Jr. sang Himamaylan, Negros Occidental POO2 (3rd Runner-up); Gutery Joy L. Asgar sang San Lorenzo, Guimaras (4th Runner-up); Richie Mae A. Napacia sang Patnongon, Antique (5th Runner-up); kag Mary Grace Iguin sang Lezo, Aklan (6th Runner-up), nagbaton naman sang P2,000.00 nga kas kag plake.
Napilian naman bilang Best in Talent si Prudente, Best in Production si Iguin kag Best in Interview si Daquira.
Natalana sa Nobyembre ang pito ka mga pumalasakop kaupod si Montesa G. Caoyonan, 4Ps Information Officer II kag isa ka Municipal Link magkadto sa syudad sang Cebu agud magtambong sa National Children’s Congress nga may tema “NCC focusing on Disability Inclusion to Support 4Ps policy on Children With Disability (CWD).
Nangin hurado sa amo nga paindis-indis sanday PIA Iloilo Government Information Center Coordinator Lilibeth French, IMT Operations Manager Elyrose N. Naorbe; Regional Program Coordinator for Administration of 4Ps Christian B. Baldonasa kag CHED 6 Chief Education Program Specialist Dr. Rex Casiple.
Ginpasalamatan naman ni Assistant Regional Director for Administration Joselito Estember ang mga program implementers, partners, kag stakeholders sa kadalag-an sang 4Ps. Suno kay Estember, nga anay 4Ps Provincial Link, pinaagi sa programa madamo nga imol nga panimalay ang nakapadala sang ila mga kabataan sa eskwelahan tubtub nga nakagradwar ini sila sa kolehiyo kag iban sini sa ila ang nakatapos nga may Latin honors.
Suno kay Estember ang aktibidad nagapakita nga ang 4Ps indi isa ka dole out apang isa ka developmental program kag sa karon isa ka improved program sang panguluhang nasyunal.
Sa bahin naman ni Regional Information Officer (RIO) Atty. May Rago Castillo ginpahayag sini nga ang tema sa karon nga tuig nga nagasentro sa Disability Inclusion to Support 4Ps policy on Children With Disability isa ka powerful advocacy samtang ginaduso sang departamento para sa inclusion, accessibility kag mobility subong man sa pagbukas sang mga oportunidad para sa 4Ps Children with Disability. (AAL/LAF/PIA Iloilo/DSWD6)
