SYUDAD SANG ILOILO (PIA) – Isa ka komprehensibo nga paghanas sa Community Organizing ukon pagdumala sa komunidad ang ginpatigayon para sa mga naga-implementar sang Special Area for Agricultural Development (SAAD) Program Phase 2 kag nagkalainlain nga National Fisheries Projects.
Ini gin-organisa para pabakuron ang ihibalo kag kapasidad sa pagpamuno sang mga partisipante sa rehiyon.
Sa pagpanguna sang Bureau of Fisheries and Aquatic Resources (BFAR) 6, ang lima ka adlaw nga paghanas ginhiwat sa Provincial Fisheries and Aquatic Resources Training, Development, and Product Center (PFARTDPC) sa New Washington, Aklan. Ini paagi sa Regional Fisheries Training and Fisherfolk Coordination Division (RFTFCD) sang ahensya.
Nalakip sa paghanas ang interactive lectures, workshops, team-building exercises, role-playing, kag pagpakigbahin sang best practices.
Ang programa gindisenyo para tudluan ang mga partisipante sang estratihiya sa pagdumala sang komunidad, ilabi na para mapasangkad ang ila mga abilidad sa paggiya sa fisherfolk organizations sa rehiyon.
Ginpunto ni Richard E. Cordero, Officer-in-Charge sang Provincial Fisheries Office of Aklan, ang importansya sang maayo nga pamalakat sa bahin sang fisherfolk organizations. Iya man ginpahibalo ang kritikal nga papel sang “skilled leadership” kag “efficient workforce development” sa paglab-ot sang misyon sang BFAR.
Sa ginpatigayon nga paghanas, and hepe sang RFTFCD nga si Jessica C. Esmao ginpatpat ang mga importante nga aspeto sang community organizing lakip na ang facilitation techniques, leadership development, conflict management, kag husto nga implementasyon sang social preparation activities sa mga SAAD sites.
Ang mga manughanas nga sang san-o lang nagpakigbahin sa National Training of Trainers for Community Organization Towards Social Mobilization ang nagpalab-ot sang ila mga natun-an sa mga partisipante. (AAL/AGP/ PIA 6 kalakip ang mga balita gikan sa BFAR 6)
