SYUDAD SANG ILOILO (PIA) — Ginhatagan talupangod sang Bureau of Fisheries and Aquatic Resources (BFAR) ang export potential sang sektor sang pangisdaan sa Western Visayas sa ginhiwat nga Export Business Forum sa Iloilo City.
Ginpahayag ni Remia Aparri nga direktor sang BFAR 6 nga ini bangud sa dako nga kontribusyon sa national fisheries production sang Western Visayas bilang ika-lima sa tanan nga rehiyon sang pungsod sa tuig 2023.
Suno kay Aparri, ini bangud sa bugana ang katubigan sang rehiyon sang mga ginakonsiderar nga “high-value commodities” kaangay sang hipon, bangus, kag kasag ukon blue swimming crab nga nagadominar sang export portfolio sang rehiyon.
“These species, our processed products such as canned crab meat and deboned milkfish, offer significant export potential, especially in markets such as the United States, Japan, and China,” siling ni Aparri.
Iya man ginpakigbahin ang importansya sang pagdugang balor sa mga raw products bangud ang mga ginproseso nga fishery exports nagakahulugan man sang mas mataas nga presyo sa internasyonal nga merkado.
“Exporting processed goods not only increases profitability for our local fisheries but also enhances our competitive edge in the global market,” dugang ni Aparri.
Ginkilala man ni Aparri ang papel sang mga mayor nga mga hub sa Iloilo, Capiz, kag Negros Occidental bilang suporta sa export processes, kon sa diin ang processing plants nga ini naga siguro nga malab-ot ang international safety kag quality standards.
Iya man ginsambit ang mga panikasog nga ila ginabuhat para mapabaskog ang “traceability” kag responsable nga resource management, ilabi na sa blue swimming crab, para sa pagsustenar sang pangisdaan sa rehiyon. (AAL/AGP/PIA 6 kalakip ang report gikan sa BFAR 6)
