SYUDAD SANG ILOILO (PIA) — Sa katuyuan nga mas pabakuron ang kapasidad sang mga empleyado para sa isa ka “gender-responsive fisheries,” ang Bureau of Fisheries and Aquatic Resources (BFAR) 6 nagpatigayon sang duha ka adlaw nga capacity development training tuhoy sa Harmonized Gender and Development Guidelines (HGDG) sang Pebrero 6-7.
Gikan sa nagkalainlain nga probinsyal kag rehiyonal nga opisina, ang 30 ka mga partisipante ang nagtambong sa paghanas nga ginalantaw nga mas pasangkaron ang paglakip sang gender perspectives sa pagplano, implementasyon, kag ebalwasyon sa patag sang pangisdaan.
Nalakip sa mga topiko nga gindiskusyunan amo ang kinalain sang sex kag gender, gender roles, kag importansya sa pagkonsulta sang pareho nga lalaki kag babayi sang mga programa sa pangisdaan.
Ginpaidalom man ang mga partisipante sa hands-on exercises, kon sa diin ila gin-aplikar ang gender lens sa mga sample nga project proposals bag-o tan-awon ang aktwal nga fisheries initiatives.
Nangin resource person ukon facilitator sang aktibidad si Velma Lao, isa ka miyembro sang Gender and Development Resource Pool sang Philippine Commission on Women (PCW).
“When women are economically empowered, they gain independence and are better able to protect themselves from abuses. Financial stability gives them the ability to fight, negotiate, and make informed decisions,” siling ni Lao.
Suno naman sa hepe sang Regional Fisheries Training and Fisherfolk Coordination Division nga si Jessica C. Esmao, importante nga maglantaw sang lampas pa sa sex-disaggregated data kag ilakip ang mga prinsipyo sang GAD sa apat ka key areas sang fisheries kaangay sang livelihood, enforcement, research and development, kag training programs.
“While we consult stakeholders before proposing projects, we previously lacked a structured approach to making them truly gender-responsive. This training has given us clarity and concrete steps,” siling ni Alvin D. Beltran gikan sa Provincial Fisheries Office (PFO)- Capiz.
Para naman kay Maria Aimee A. Sobrevega, officer-in-charge sang PFO Iloilo, ang paghanas nagserbe nga “refresher” sa mga konsepto sang GAD, samtang ginasuportaran sini ang kinahanglanon nga pag-ebalwar sang mga proposal paagi sa gender kag ecosystem approach sa fisheries management lenses.
Positibo man ang paglantaw sang BFAR sa pag-institusyonalisar sang gender-responsive fisheries projects bangud sa mas ginpasangkad nga ihibalo kag praktikal nga mga instrumento nga gintudlo sa ila mga empleyado. (AAL/AGP/ PIA 6 kalakip ang mga balita gikan sa BFAR 6)
