Photo courtesy of BFAR 6
SYUDAD SANG ILOILO (PIA) – Naglab-ot sa 4.45 sa 5 nga satisfaction rating ang nakuha sang Bureau of Fisheries and Aquatic Resources (BFAR) 6 sa field monitoring kag ebalwasyon sang mga programa sini nga ginhiwat sang damlag lang.
Ginpakita sang resulta nga 76 ka porsyento ka mga nagresponder ang may nagtaas nga dakop sa pagpangisda ukon produksyon bangud sa mga bulig nga ginhatag sang BFAR.
Subong man, ang kalidad, kantidad, kag timeliness sang ginhatag nga suporta sang BFAR ginakonsiderar nga “very good” sang kalabanan nga fisherfolk-beneficiaries.
Ang Fisheries Planning and Economics Division (FPED) sang BFAR Central Office ang naghiwat sang assessment sang Setyembre 2-6 sa mga kaprobinsyahanan sang Iloilo, Guimaras, kag Negros Occidental.
Suno sa balita halin sa BFAR 6, ang FPED nagpili sang 21 ka random respondents para magpartisipar sa ebalwasyon kon sa diin 29 ka porsyento sini ang kababainhan kag 71 porsyento naman ang kalalakinhan.
Ang mga proyekto nga gin ebalwar amo ang mga ginhatag sang tuig 2023 nga ginalakipan sang technology demonstrations, fingerlings distribution, climate-resilient fish cages, legal fishing gears kag paraphernalia, fiberglass plastic-reinforced fishing boats, kag post-harvest kits.
Ang pagtukod sang mga fisherfolk association ang ginkilala bilang best practice, kaupod ang mga technology demonstration activities nga nagbulig sa pagpataas sang community engagement sa bahin sang pangisdaan nga sektor.
Dugang pa, apisar sa mataas nga ihibalo sang mga nagresponder sa climate change, may mga nakita sa gihapon nga mga panghangkat kaangay sang sub-optimal fish production bangud sa mga predators, peste, kag mga epekto sang El Niño nga nangin rason sang high mortality rate sang tilapia fingerlings.
Para mas mapasangkad ang paghatag serbisyo kag implementasyon sang mga proyekto, ang BFAR 6 nagaplano nga mas pabaskugon ang mga inisyatiba sa paghanas ilabi na sa tilapia farming nga gin rekomendar sang FPED team.
Ang BFAR naga plano man nga mas pabaskugon ang ila Information, Education, and Communication (IEC) nga kampanya ilabi na sa proper farm management para malikawan ang mga kapirdehan.
Padayon man nga pag monitor sang lower-producing beneficiaries sang mga ginhatag nga suporta kaangay sang fish cages ang ginrekomendar para mapat-ud nga ma-improbar ang production output kag income kag para man batunon sang mga tawo ang “sustainable fisheries practices” sa komunidad. (AAL/AGP/PIA 6 kaupod ang balita halin sa BFAR 6)
