SYUDAD SANG ROXAS, Capiz (PIA) — Ang Department of Agriculture – Bureau of Fisheries and Aquatic Resources Regional Office 6 (DA-BFAR 6) nanghatag sang fiberglass boats kag fingerlings sa mga Capiznon nga mangingisda sa bag-o lang natapos nga Bagong Pilipinas Service Caravan.
Sa pagpanguna sang Office of the Provincial Assistant for the Visayas (OPAV), 10 ka mga indibidwal ang nakabaton sang tag 1,000 ka mga fingerlings ukon similya sang isda kag lima naman ang nakabaton sang fiberglass boats nga may underwater fitting kag marine engine.
Sa interview sang isa ka lokal nga waragwagan, dako ang pasalamat sang isa sa mga benepisyaryo nga nakabaton sang fiberglass boat.
“Salamat sa BFAR kay gintagaan kami sang dako nga palangitan-an,” suno sa iya.
Luwas sa pagpanghatag sang assistance, may ara man nga technical assistance booth ang BFAR kon sa diin naga proseso ini sang fisherworkers licenses, nagpanghatag sang materials para sa pagpangisda kag fisheries management, kag pagpasilidad sang mga similya sang tilapia kag pantat sa pagsuporta sang mga palaabuton nga aquaculture project.
“This is more than just delivering services, it’s about showing our people that the government cares and is here to support them in every step of the way,” pahayag ni Usec. Terrence Calatrava sang OPAV.
Kaupod sang 30 ka nagkalain-lain nga national government agencies (NGAs), ang caravan nakapanghatag sang suporta sa mga kubos sa inisyatibo sang OPAV kag kolaborasyon sang Office of the House Speaker Martin Romualdez nga ginumpisahan sang nagligad lang nga tuig.
Ang Bagong Pilipinas Service Caravan ang isa sa pamaagi sang gobyerno sa pag dul-ong sang serbisyo palapit sa tawo.
Dugang sang BFAR nga ang pagpasakop sang Bureau ang nagahatag pagtalupangod sa importansya sang sustainable fisheries development sa pagsuporta sang lokal nga palangitan-an. (AGP/PLF/PIA Capiz)
