BFAR 6 nagpain P28M para sa 2025 nga implementasyon sang SAAD Program

SYUDAD SANG ILOILO (PIA) — Nagpain ang Bureau of Fisheries and Aquatic Resources Region (BFAR) 6 sang P28 milyon para sa implementasyon subong nga  2025 sang Special Area for Agricultural Development (SAAD) Program.

Ini nga programa ginalantaw nga maghatag suporta sa mga fisherfolk associations sa Aklan, Antique, Guimaras, Iloilo, kag Negros Occidental.

Nagpatigayon ang ahensya sang duha ka adlaw nga planning workshop kag year-end review para mapat-od ang husto nga pagplano para sa implementasyon sang mga proyekto subong nga tuig.

Sa  pagpamuno sang Regional Program Management Support Office (RPMSO) sang BFAR 6, gintipon ang 30 ka partisipante humalin sa Provincial Program Management Support Office (PPMSO) kag area coordinators.

Nagtipon ang mga partisipante sa planning workshop sang BFAR para sa implementasyon sang SAAD Program para sa tuig 2025. (BFAR 6 photos)

Ang mga diskusyon nakasentro sa alokasyon pinansyal, project targets, kag mga estratehiya para sa key components sang programa nga Social Preparation, Fisheries Production and Livelihood (FPL), Marketing Assistance and Enterprise Development (MAED), kag Program Management.

Ginbalikan man ang mga kadalag-an sang tinalikdan nga tuig kon sa diin nalapawan pa ang mga targets sa livelihood assistance nga naglab-ot 115 porsyento kag MAED projects nga nakaagum 108 porsyento nga completion rate.

Ginpakigbahin man sang mga partisipante ang ila best practices, ginsabat ang mga paghangkat, kag ginhusay ang operational plan para sa subong nga tuig 2025. (AAL/AGP/PIA 6 kalakip ang mga balita gikan sa BFAR 6)

In other News
Skip to content