SYUDAD SANG ILOILO (PIA) – Nagpabutyag sang ila suporta ang Bureau of Fisheries and Aquatic Resources (BFAR) 6 sa Proyekto nga “LAWA at BINHI” sang Department of Social Welfare and Development (DSWD) 6.
Kaangot sini, ginpatigayon ang pagpirmahanay sang Memorandum of Understanding (MOU) para sa Proyekto nga LAWA at BINHI ukon Local Adaptation to Water Access and Breaking Insufficiency through Nutritious Harvest for Impoverished sa Days Hotel, syudad sang Iloilo, sang Agosto 1, 2024.
Suno kay Special Assistant to the Secretary Maria Isabel Lanada sang DSWD nga importante ang proyekto ilabi na sa mga pigado nga sektor, lakip na ang mga kababainhan, mangunguma, kag mangingisda nga apektado gid sang mga kalamidad kaangay sang El Niño.
Sa balita sang BFAR 6, nalakip sa Proyekto LAWA ang pagpasangkad sang water access kag padumala sang mga komunidad nga apektado sang tag-ilinit kag kakulangan sa tubig pamaagi sa pagtukod sang small farm reservoirs, pagkay-o ukon rehabilitasyon sang water harvesting facilities, paghibalo sang nagkalain-lain nga suplay sang tubig, kag iban pa.
Ang Proyekto BINHI naman nagaduso sang seguridad sa pagkaon kag nutrisyon sa mga komunidad, pamaagi sa paghibalo sang climate-resilient nga mga pamaagi kaangay sang communal and urban gardening, aquaculture, vermicomposting, kag pagtanum sang disaster-resilient crops, fruit-bearing trees, kag mangroves.
Nagtambong man si BFAR 6 Regional Director Remia A. Aparri kaupod ang iban nga stakeholders sa ginhiwat nga MOU signing kag nagpakita man sang iya suporta sa proyekto ilabi na sa paglab-ot sang seguridad sa pagkaon.
“By ensuring water sufficiency, we lay the groundwork for sustainable agriculture and aquaculture, which are critical to our nation’s food security. Fresh fish can be made available to our upland communities, indi na uga lang ang makadab-ot sa ila kundi naga-pisik-pisik nga isda,” siling ni Aparri.
Mahibaluan nga ang BFAR 6 nakapanghatag na sang 25,000 ka fingerlings sa banwa sang Calatrava sang Hulyo 31.
Padayon man ang talatapan sa paghatag bulig sa mga programa sang DSWD pamaagi sa hands-on training kag technical consultancy sang tagsa ka Provincial Fisheries Offices sa bug-os nga rehiyon.
Subong man, ang Negros Occidental kon sa diin ang San Carlos kag Himamaylan, natalana na nga makabaton sang fingerlings sa mga masunod nga binulan suno sa ahensya.
Dugang pa ni Aparri, ang proyekto nasandig gid sa misyon sang BFAR nga pasangkaron ang seguridad sa pagkaon kag pagtanyag sang sustainable livelihoods nga labi pa sa distribusyon sang tilapia kag catfish fingerlings.
Ang tagsa ka provincial site sang proyekto nagpresentar man sang ila mga accomplishments nga nalakip ang communal kag urban gardening, aquaculture, pagtanum sang disaster-resilient crops pamaagi sa cash-for-work kag cash-for-training nga mekanismo.
Nagtambong man sa MOU signing ang Office of the Civil Defense, Department of the Interior and Local Government, University of the Philippines Visayas, Department of Labor and Employment, kag Department of Agriculture. (AAL/AGP/PIA 6 with reports from BFAR 6)
