SYUDAD SANG ILOILO (PIA) — Sa katuyuan nga mas pasangkaron ang serbisyo sa inspeksyon kag quarantine sini nga tuig, ang Regional Fisheries Inspection and Quarantine Unit (RFIQU) sang Bureau of Fisheries and Aquatic Resources (BFAR) 6 nagpatigayon sang tatlo ka adlaw nga workshop humalin Enero 13 tubtob 15.
Ini nagatan-aw nga takson ang nangin performance sang yunit sang 2024, mas pabakuron ang kinaadman sang mga personnel sa food safety kag quarantine procedures, kag husayon ang strategic work kag financial plan para sa tuig 2025.
Ginadumalahan sang RFIQU ang inspeksyon kag quarantine sang fishery products kag key entry kag exit points sa Aklan, Antique, Capiz, Iloilo, kag Negros Occidental nga nagasiguro sang ikaayong-lawas sang publiko kag padayon nga suporta sa industriya sang pangisdaan.
Paagi sa pag-monitor sang hulag sang isda kag iban pa nga fishery products sa mga airports kag seaports, ginapiho sang yunit ang pagsunod sa nasyonal kag internasyonal nga food safety standards samtang ginalikawan ang paglapta sang fish diseases sa mga border.
Sang 2024, nakaamot sing dako ang RFIQU sa pagmintinar sang kalidad kag safety sang fishery products sa Western Visayas paagi sa pag-isyu sang 40,374 nga local transport permits (LTP) kag pag-inspeksyon sa 43,239 fisheries commodities.
Tinutuyo man sang BFAR nga padamuon ang presensya sang quarantine kag inspection officers sa mga menor nga ports.
“As members of the RFIQU, your work directly impacts these outcomes. Through meticulous inspection, quarantine processes, and compliance with regulations, you ensure that our fishery products are safe, high-quality, and aligned with global standards,” siling ni BFAR 6 Regional Director Remia A. Aparri sa iya mensahe, samtang iya ginhatagan pagtamod ang importansya sang refresher course sa Fisheries Quarantine Manual of Procedure (MOP) kag key food safety regulations.
Gindala man sa workshop ang pagpakigbahin sang datos sang transboundary movement sang top fishery products sa Western Visayas.
Nahibaluan nga gikan 2021 tubtob 2023, ang Pacific white shrimp, sardinas, kag Asian eels ang ginakabig nga most transported species base sa volume, samtang ang blue swimming crabs naman ang nagapanguna sa bahin naman sang market value.
Suno sa BFAR, pinaagi sa workshop, ginalantaw sini nga mas pabakuron ang kapasidad sang RFIQU sa pagdul-ong sang maayo, science-based, kag globally competitive nga serbisyo sa fisheries inspection kag quarantine nga mahimo makaamot sa pagpataas sang ekonomiya kag seguridad sa pagkaon. (AAL/AGP/PIA 6 kalakip ang mga balita halin sa BFAR 6)
