SYUDAD SANG ILOILO (PIA) – Opisyal na nga ginlunsyar sang Bureau of Fisheries and Aquatic Resources (BFAR) 6 ang Closed Fishing Season sa Visayan Sea ukon ginatawag nga “Pahuway sang Baybay” sang Nobyembre 15, 2024 sa Estancia, Iloilo.
Ang seasonal closure kritikal sa konserbasyon para sa pagpanumbalik sang populasyon sang mga pili nga species sang isda, importante para sa malawig nga seguridad sa pagkaon, kag pagpalig-on sang ekonomiya sang nagapalibot nga mga munisipyo.
Nag-umpisa ang aktibidad sa policy dialogue nga naglakip sang mga diskusyon sa legal framework sang Fisheries Administrative Order (FAO) 167-3, series of 2013, kag sang scientific basis sa pag-implementar sang polisiya.
Sakop sang pagpatuman sang amo nga layi ang pagdumili sang pagdakop, pagbaligya, kag pagbakal sang mga sahi sang tuloy, tamban, tabagak, balantiyong, gumaa, bulao, kag hasa-hasa tubtob Pebrero 15, 2025.
Bag-o ang send-off, nagpatigayon ang partner law enforcement agencies sang operations planning session para tapuson ang enforcement strategies.
Sa iya pambungad nga mensahe, ginhatagan pagtamod ni BFAR 6 Regional Director Remia A. Aparri ang importansya sa pagtugot sang populasyon sang isda sang nagakaigo nga ti-on para maka-recover.
“Closed Season is not enough. We have to provide a very good environment for these species by protecting the critical habitats,” siling ni BFAR 6 Regional Director Remia A. Aparri.
Nagtambong man sa aktibidad ang mga rehiyonal nga opisina sang BFAR sa Rehiyon 5 kag 7, nga ginrepresentar nila Regional Directors Ariel U. Pioquinto kag Mario N. Ruinata.
Kaupod man sa diskusyon ang mga opisyales sang mga lokal nga pamunuan kag mga tiglawas sang Philippine Coast Guard (PCG), Philippine National Police (PNP) Maritime Group, Criminal Investigation and Detection Group (CIDG), Maritime Industry Authority (MARINA), kag mga myembro sang lokal nga komunidad sang pangisdaan.
Ang ini nga tuigan nga closure ukon Pahuway sang Baybay, ginalantaw nga nagasuporta sa populasyon sang isda sa ti-on sang ila natural reproductive kag growth cycles. Paagi sa pag-regulate sang mga hilikuton sa pagpangisda sa lugar, ginalantaw sang BFAR nga mamintinar ang kadamuon sang isda, suportahan ang biodiversity, kag mapabakod ang long-term food security. (AAL/AGP/PIA 6 kalakip ang mga balita halin sa BFAR)
