SYUDAD SANG ILOILO (PIA) — Ginpangunahan sang Bureau of Fisheries and Aquatic Resources (BFAR) Western Visayas ang duha ka adlaw nga seminar para mapabaskog ang assessment kag valuation process para sa Fishpond Lease Agreements (FLA) areas.
Gintipon sang aktibidad ang leasing kag regulatory officers sa bug-os nga Western Visayas para husayon ang mga protocol kag mapasangkad ang pagdul-ong sang serbisyo.
Sa pagpamuno ni BFAR Regional Director Remia A. Aparri, iya ginhatagan pagtamod ang holistic approach sa pagdumala sang pangisdaan.
“We must not limit ourselves to a regulatory focus alone. Our approach should be comprehensive, incorporating all elements that contribute to the sustainability of our fisheries resources,” suno kay Aparri.
Ginpatigayon sang abogado nga si Jan Rey Magallosa sang Leasing Section ang diskusyon sa nagabalik-balik nga mga isyu legal kag administratibo, kon sa diin iya ginpunto ang importansya sang transparency kag maathag nga komunikasyon.
Ginpakigbahin naman ni Fishing Regulatory Officer Edryl Buenavides ang mga panan-awan gikan sa provincial monitoring reports, kon sa diin iya ginhayag ang kinahanglanon para sa padayon nga capacity-building, ilabi na para sa mga bag-o lang natalaga nga leasing personnel.
Sa pihak nga bahin, si Andresito O. Jocsing, Financial Analyst III sang Department of Finance- Bureau of Local Government Finance, ginpahayag naman ang papel sang husto nga impormasyon sa property appraisal.
Para ma-streamline ang operasyon kag mapabaskog ang pagmonitor, ang grupo nagtalaga sang provincial focal persons para magbantay sang progreso sang FLA applications. Ginsambit man ang digitalization bilang primero nga estratihya para ma-improba ang data management, documentation, kag overall efficiency.
Sa iya mensahe, gin-agda ni Aparri ang mga partisipante nga mangin proactive leaders sa fisheries governance.
“We must take ownership of our goals, be catalysts of change, and uphold integrity in all that we do,” dugang pa niya.
Nasandig sa mandato sang ahensya nga magdumala kag magtipig sa fisheries kag aquatic resources sang pungsod, ang seminar nagalantaw nga hatagan ang FLA personnel sang nagakaangay nga ihibalo sang assessment protocols lakip na ang proper valuation sang fishpond improvements nga kinahanglanon sa idalom sang Fisheries Administrative Order No. 197-2, series of 2024. (AAL/AGP/ PIA 6 kalakip ang mga balita gikan sa BFAR Western Visayas)
