SYUDAD SANG ILOILO (PIA) — Nagpanagtag ang Bureau of Fisheries and Aquatic Resources (BFAR) sa Western Visayas sang pila ka yunits sang 62-footer Fiberglass Reinforced Plastic (FRP) Tuna handline fishing boat.
Sang damlag lang, nakabaton ang San Joaquin United Fishermen Cooperative (SJUFC) sang isa sini paagi sa Capacitating Municipal Fisherfolk nga programa sang ahensya.
Ginpatigayon ang pagpirma sang Memorandum of Agreement (MOA) kag bendisyon sang bangka sa Community Fish Landing Center sang San Joaquin, Iloilo.
“Bugalon gid kami, kay sa bilog nga probinsya sang Iloilo, San Joaquin lang gid ang napilian para sa ka dya nga proyekto,” siling ni Ely Sercidillo, MFARMC chairperson sang San Joaquin sa iya mensahe.
Maluwas sa San Joaquin, lima ka iban pa nga yunits ang ginturn-over sa Hamtic kag Libertad, Antique; Hinoba-an, Negros Occidental; Nueva Valencia, Guimaras; kag Malay, Aklan.
Kaupod sang fishing boat amo ang fishing gears kag accessories kag anum ka yunits sang pakura boats.
Ang ini nga proyekto kabahin sang pagpanikasog sang gobyerno nga hatagan ang mga lokal nga mangingisda sa nagkalain-lain nga komunidad sang moderno kag mapag-on nga fishing technology.
“Kabay pa nga aton tandaan nga ang matawhay nga pangisdaan wala lang sa modernong kagamitan kundi sa pag-ulikid mismo naton sang aton kadagatan. Challenge ko sa aton mga fisherfolk kag lokal nga panguluhan—ang paggamit sang mas maayo nga kagamitan dapat kaupod sang mas responsableng pagpangisda,” siling ni BFAR Western Visayas director Remia A. Aparri.
Ang banwa sang San Joaquin nakarehistro sang 1,816 ka mga mangingisda nga nagasalig sa ila pagpanakop kag pagbaligya sang isda bilang palangabuhian.
“Gapasalamat gid ako sa BFAR kay natugruan ang SJUFC sang sakayan para mabuligan ang mga mangingisda sa San Joaquin. Unexpected dya. Kag buong puso namon dya nga batunon kag tinguhaan nga pauswagon para maging modelo man sa iban nga gintugruan,” suno kay Banjamin Imbang, chairperson sang SJUFC.
Ang San Joaquin, amo isa ka primero-klase nga munisipalidad nga may yara 22 ka coastal barangays, nga nagaamot sang 6.05 porsyento ukon 942.48 metriko tonelada sa produksyon sang isda sa bug-os nga probinsya sang Iloilo. (AAL/AGP/PIA 6 kalakip ang mga balita gikan sa BFAR 6)
