SYUDAD SANG ILOILO (PIA) — Nagpatigayon ang Bureau of Fisheries and Aquatic Resources 6 sang Information, Education, and Communication (IEC) nga kampanya sa syudad sang Iloilo sa katuyuan nga mapasangkad ang ihibalo sang fish brokers, transporters, kag traders tuhoy sa mga layi kag regulasyon sa pagpangisda.
Nakasentro ang diskusyon sa paghibalo sang “dynamited fish” kag pagtipig sang Blue Swimming Crab (Portunus pelagicus) nga nasandig sa Joint Administrative Order No. 01, Series of 2014.
Ang knowledge expert nga si Glenn D. Nonifara, Fishing Regulations Officer (FRO)1 sang BFAR 6, ginpatpat ang importansya sang maayo nga panghimanwa sa pagbalanse sang ecological kag human well-being, kung sa diin iya ginsambit nga ang municipal waters sakop sang mga local government unit.
Samtang, si FRO2 Julius P. Olvido, FPLEG-Guimaras team leader, ang nagsaysay naman sang mga kaundan sang JAO 01, Series of 2014, kung sa diin iya ginpatpat ang ang limitasyon sa kadakuon sang kasag nga pwede ibaligya kag ang mga penalidad sa pagbaligya sang undersized ukon berried crabs.
Sa pihak nga bahin, si FRO1 Byron C. Batay ginpalapnag naman kung paano maghibalo sang dynamited fish paagi sa internal kag external signs sini, dala na ang legal penalties sa idalom sang Section 126 sang Amended Fisheries Code of the Philippines for handling fish caught using explosives.
Ang ini nga kampanya naangot sa food safety initiatives sang PFDA, gikan sa mga kasugtanan sang 1st Quarter Regional Inter-Agency Task Force Against Illegal, Unreported, and Unregulated Fishing (RIATF-IUUF) nga pagtililipon nga ginpatigayon sang Abril sa sini nga tuig.
Ang aktibidad ginhiwat sa pagpamuno sang Fisheries Protection and Law Enforcement Group (FPLEG) sang BFAR, kaupod ang Philippine Fisheries Development Authority (PFDA) 6. (AAL/AGP/PIA 6 kalakip ang mga balita halin sa BFAR 6)
