CEBU CITY, Cebu (PIA) – Ang Bureau of Fisheries and Aquatic Resources (BFAR) Region 7 nagpahinumdom sa mga mananagat ug sa mga local government units (LGUs) kabahin sa gipatuman nga Joint Administrative Order 01 nga naglatid og mga regulasyon sa pagdakop og Blue Swimming Crab (BSC) ug malikayan ang overfishing niini.
Usa sa mga gituki atol sa gipahigayon nga Coastal Law Enforcement Alliance in Region 7 (CLEAR-7) Meeting niadtong Abril 4, mao ang direktiba nga gipatuman sa BFAR inubanan sa Department of Agriculture (DA) ug Department of the Interior and Local Government (DILG).
Ang BFAR nanawagan og kooperasyon gikan sa tanang sektor aron masiguro nga mapalig-on ang implementasyon sa mga regulasyon, nga maglakip sa mga limitasyon sa paggamit sa fishing gear aron malikayan ang overfishing ug pagkonserbar sa mga Blue Swimming Crab.
Ang Joint Administrative Order 01 nagtakda og mga kondisyon nga kinahanglan sundon sa mga mananagat ug nagmando usab sa mga LGUs sa pagtutok ug pagsiguro nga ang mga mananagat ubos sa crab fisheries sector tinud-anay nga makaparehistro aron mapadayun ang pagmonitor sa ilang mga operasyon sa kadagatan ilabi na sa pagdakop og Blue Swimming Crab.
Kini usab nagmandar sa mga LGUs nga ipatuman ang mga silot alang sa mga molapas sa mga polisiya nga gipatuman ubos sa maong direktiba.
Matod sa BFAR-7, ang Blue Swimming Crab naglangkob sa 1.3 porsyento sa nasudnong aquaculture production ug adunay production value nga nagbalor og P4.5 billion.
Busa, ang pagpatuman sa mga regulasyon nagtinguha nga mapalambo ang kahimtang sa industriya ug malikayan ang pagkaus-os sa populasyon sa mga Blue Swimming Crab (BSC).
Usa usab mga tinguha sa maong direktiba mao ang pagpa-uswag sa rating sa Blue Swimming Crab fishery gikan sa “red” nga kahimtang, nga nagpasabot sa overfishing ug pagkunhod sa populasyon sa BSC, ngadto sa “yellow” nga nagpasabot sa normal o maayong kahimtang.
Ang pagpadayon sa pagdumala sa industriya magsilbi usab nga usa ka paagi sa pagpanalipod sa mga BSC ug sa mga komunidad nga nagdepende niini.
Gipahimangnuan usab sa BFAR nga dili gayud tugotan ang bisan kinsa nga magpanag-iya o magbaligya og berried BSC, o magdala niini nga walay valid nga auxiliary invoice o Local Transport Permit (LTP).
Kini nga mga regulasyon nagtinguha sa paglikay sa ilegal nga pag-transport ug pagbaligya sa mga BSC.
Ang mga mananagat, grupo, o si kinsa mang indibidwal nga molapas sa mga regulasyon nga nalangkob sa Joint Administrative Order 01 posibleng mag-atubang og mga penalty gikan sa P2,000 hangtod P20,000 nga multa o pagkabilanggo gikan sa unom ka bulan hangtod sa duha ka tuig, sumala sa mga probisyon nga gitakda sa RA 8550 (Fisheries Code of 1998) ug RA 9147 (Wildlife Conservation and Protection Act).
Ang BFAR nag-awhag sa partisipasyon ug kooperasyon sa tanang sektor aron padayun pa nga mapalig-on ug mapalambo ang crab fisheries sector nga importanteng matang usab alang sa mga komunidad ug industriya nga ang nag-unang panginabuhian nag depende niini. (RGC/PIA7 Cebu with reports from BFAR7)
