BFP nagapatuman kang online application para sa fire safety inspection certificate

SAN JOSE, Antique (PIA) – Gin-anunsyo kang Bureau of Fire Protection (BFP) ang anda pagpatuman ka fire safety inspection certificate applications online paagi sa Fire Safety Inspection System (FSIS).

Suno kay BFP- Antique Senior Fire Officer Jefferson A. Cordero, ang FSIS sangka pamaagi agud mapasanyog pagid kang publiko ang anda serbisyo sa mga katawhan.

Dya nga lihuk kabahin kang “digitization program” kang atun gobyerno parehas man kang iba nga ahensya agud mangin mahulas sa katawhan ang pagtransaksyon sa BFP.

Ang pagparehistro sa FSIS ginpatuman lamang umpisa kang Disyembre 2024.

Sa kadya nga Enero, ang mga naga-renew ukon naga apply kang business permit pwede run mag apply online paagi sa FSIS bisan sa anda panimalay, opisina, ukon diin man nga lugar basta may internet connection.

Ang aplikante kinahanglan lamang magbukas sa internet kang website nga https://fsis.e-bfp.com kag sundun ang mga pamaagi kag ginapangayo nga dokumento hasta matapos ang rehistro.

Gindugang man ka BFP nga ang aplikante magabayad kang indi magnaba sa P500 para sa Fire Safety Inspection Clearance ukon 15 porsyento ka ana kabilogan nga baraydan paagi sa online payment application.


Gindugang hambal ni Fire Officer Euly Mae D. Raymaro paagi sa FSIS nga indi run kinahanglan magpila pa sa BFP para makabuol kang fire safety clearance.


Ang tanan nga banwa may istasyunan run kang bombero suno kay Raymaro nga mahimo magbulig sa aplikante sa online registration.


Ginpa-athag ka BFP nga wara ti gindugang nga papeles ukon requirements kundi nga ang nahauna run nga requirements amo man ginhapon ang ginapangita.


Ang BFP, sa pagpamuno ni Fire Superintendent Patricio Collado, nagpasiguro sa publiko nga anda ginahimo ang tanan para sa seguridad kang katawhan sa Antique nga marayo sa sunog, gani dapat sundun ang proseso sa pagparehistro sa BFP. (AGP/PSM/PIA Antique) 

In other News
Skip to content